Zvicra do t’i luajë në nëntor dy takimet e fundit të Ligës së Kombeve, kundër Sllovenisë dhe Skocisë. Përballja me sllovenët, e caktuar për 13 nëntor, nuk do të mbahet në stadiumin e planifikuar fillimisht në Lubjanë.
Federata e Futbollit të Zvicrës bëri të ditur se ndeshja do të zhvillohet në Maribor, në stadiumin “Ljudski vrt”. Vendimi u mor për shkak të gjendjes së fushës në kryeqytetin slloven.
Të lidhura
None found
Sipas njoftimit të federatës, përdorimi i shpeshtë i fushës, koha e vitit dhe moti pengojnë rritjen e barit. Për këtë arsye, edhe me mirëmbajtjen intensive dhe punimet për rinovim, fusha nuk pritet të jetë në gjendje optimale ditën e ndeshjes.
Ora dhe data nuk ndryshojnë. Tifozët që kanë blerë bileta do të njoftohen për zhvendosjen dhe deri më 2 nëntor do të marrin bileta të reja për sektorin e tifozëve zviceranë në Maribor, D4.
Çështja e fushave ka qenë shqetësim edhe për përzgjedhësin e Zvicrës, Murat Yakin. Gjatë grumbullimit të parë të këtij sezoni, ai kritikoi barin tepër të gjatë në Shkup, në Maqedoninë e Veriut.
“Kur e sheh një fushë me bar shtatë centimetra të gjatë, jemi të lumtur që arritëm të stërviteshim në Turqi. Do të isha i kënaqur sikur bari të pritej, sepse në kushte të tilla nuk mund të luash futboll”, kishte thënë Yakin.
Trajneri zviceran kishte shprehur pakënaqësi edhe për fushën në Luzern, para ndeshjeve me Slloveninë dhe Maqedoninë e Veriut.
“Për ne kjo nuk është diçka e re, jemi mësuar me këtë në Zvicër. Përjashtim bën St. Galleni, ku fusha është gjithmonë e mirë. Këto janë pasojat e motit dhe lagështisë. Sigurisht që nuk është ideale”, ishte shprehur ai.
Kalimi i ndeshjes në Maribor synon të mundësojë kushte më të përshtatshme për takimin e 13 nëntorit.
