Një ngjarje e rëndë ka tronditur komunitetin shqiptar në Greqi, pasi një aksident fatal i ndodhur mbrëmjen e djeshme në Nea Peramos të Kavallës u mori jetën dy të rinjve shqiptarë.
Viktimat janë Arditi, 34 vjeç, dhe Marigleni, 36 vjeç, të cilët, sipas të dhënave, ishin miq të afërt.
Të lidhura
None found
Përplasja ndodhi në aksin rrugor mes Nea Peramos dhe zonës së Ammolofoit. Një motor dhe një monopatinë elektrike u përfshinë në aksidentin me pasoja fatale.
Arditi, që ndodhej në drejtimin e motorit, nuk mundi t’u mbijetonte plagëve të marra. Ndërsa Marigleni, i cili lëvizte me monopatinë elektrike, u dërgua në gjendje të rëndë në Spitalin e Përgjithshëm të Kavallës.
Pas mbërritjes në spital, 36-vjeçari iu nënshtrua një operacioni. Megjithatë, ai humbi jetën gjatë orëve të para të mëngjesit, pavarësisht ndërhyrjes së mjekëve, duke e çuar në dy numrin e viktimave.
Vdekja e dy miqve ka shkaktuar trishtim të madh, ndërsa familjarët dhe të afërmit e tyre po përballen me humbjen e dyfishtë dhe të papritur.
Ndërkohë, autoritetet greke po punojnë për të përcaktuar rrethanat dhe shkaqet e plota të aksidentit.
