Vladimir Putin deklaroi se Rusia do të përdorë të gjitha mjetet që ka në dispozicion nëse përballet me një sulm të drejtpërdrejtë.
Të lidhura
None found
Presidenti rus e ka përsëritur këtë qëndrim për të pesëmbëdhjetën herë brenda pak ditësh, duke lënë të kuptohet se Moska është e gatshme të ndërmarrë edhe masat më ekstreme në rast të një përplasjeje të mundshme me NATO-n.
Duke folur për përpjekjet për të ndaluar anijet ruse, Putin tha se stërvitjet e njëpasnjëshme në Detin Baltik dhe ndërhyrjet ndaj anijeve ruse janë shenja të një përshkallëzimi të rrezikshëm.
Ai iu referua edhe armëve bërthamore përmes një metafore të njohur: nëse një armë ndodhet në skenën e teatrit, herët a vonë ajo do të përdoret. “Mbajeni mend këtë”, u shpreh presidenti rus.
Ndërsa tensionet kanë arritur nivele tepër të larta, veçanërisht në lidhje me enklavën e Kaliningradit, dhe Moska ka pranuar se konflikti është “më afër se kurrë”, Putin nuk ka dhënë sinjale për uljen e toneve.
Presidenti rus fajësoi sërish Bashkimin Evropian për agravimin e situatës. Sipas tij, shkak i përshkallëzimit janë arroganca dhe vetëbesimi i tepruar i Evropës, një qasje që, siç deklaroi ai, po e çon kontinentin drejt humnerës.
Putin paralajmëroi gjithashtu se fuqitë kryesore të botës zotërojnë armë të afta të shkatërrojnë gjithë jetën ose, të paktën, ta çojnë Tokën në një gjendje katastrofike.
