LSDM ka kërkuar largimin e menjëhershëm të ministrit Ivan Stoilkoviq, të cilin e akuzon se është përfshirë në një fushatë politike në Serbi dhe se ka mbështetur, sipas kësaj partie, “agjendën serbo-ruse”.
Të lidhura
None found
Reagimi i LSDM-së vjen pas paraqitjes së Stoilkoviqit në Manastir në krah të Milica Gjurgjeviq Stamenkovskit, e njohur si Zavetnica, ministre në qeverinë teknike të Serbisë. Partia përmend qëndrimet e saj ndaj NATO-s, Rusisë dhe luftës në Ukrainë, si dhe deklaratat për Srebrenicën dhe Ratko Mladiqin.
“Ajo deklaroi publikisht: nuk pati gjenocid në Srebrenicë. Kjo bie ndesh me vendimet përfundimtare të gjykatave ndërkombëtare. Për Ratko Mladiqin ajo tha: një gjeneral i Republikës Srpska, një njeri që mbrojti popullin. Mladiq është një kriminel lufte i dënuar”, deklaroi LSDM.
Partia gjithashtu pretendon se Stoilkoviqi ka shprehur mbështetje për presidentin serb Aleksandar Vuçiq dhe se ka marrë pjesë në aktivitete të lidhura me Serbinë. Sipas akuzave të LSDM-së, ai është përfshirë edhe në organizimin e transportit për një tubim në Beograd.
LSDM kërkon që Stoilkoviqi të shkarkohet, duke e cilësuar të papërshtatshme për një ministër të RMV-së pjesëmarrjen në veprimtari politike të zhvilluara në Serbi.
