Sulm i rëndë në një shkollë të Romës, nxënësi spërkat mësuesen me sprej piperi dhe e godet me mjet prerës

Një shkollë e mesme në Romë është përfshirë këtë mëngjes nga një ngjarje e rëndë, pasi një nxënës dyshohet se ka sulmuar fizikisht një mësuese.

Sipas të dhënave paraprake, incidenti ndodhi në shkollën e mesme “Giovanni Verga”. Nxënësi dyshohet se i ka hedhur mësueses sprej piper në fytyrë dhe më pas e ka goditur me një mjet prerës.

Pas telefonatës në numrin e emergjencës 112, në ambientet e shkollës shkuan karabinierët e stacionit Centocelle të Romës. Në vendngjarje u dërguan gjithashtu edhe ekipet e urgjencës.

Mësuesja mori ndihmë mjekësore dhe u transportua për trajtim. Ajo është në gjendje shoku, ndërsa informacionet e para bëjnë me dije se jeta e saj nuk rrezikohet.

Autoritetet kanë nisur hetimet për të përcaktuar motivin dhe rrethanat e sulmit. Deri tani nuk janë bërë publike të dhëna të tjera për mënyrën si ndodhi ngjarja apo për gjendjen e nxënësit.