Ish-gjyqtari i Gjykatës Kushtetuese, Kadri Kryeziu, vlerëson se subjektet politike duhet të arrijnë një marrëveshje për zgjedhjen e nënkryetarëve të Kuvendit, në mënyrë që të mbyllet procesi i konstituimit të tij.
Të lidhura
None found
Gjatë emisionit “Intervista e javës” në KosovaPress, ai u bëri thirrje PDK-së dhe LDK-së të jenë të pranishme në seancën e së dielës. Sipas Kryeziut, Kuvendi nuk mund të funksionojë nëse mungojnë kandidatët e këtyre partive.
Ai theksoi se LVV-ja nuk mund t’u caktojë partive të tjera emrat që duhet të propozojnë për postet e nënkryetarëve.
Kryeziu tha se secila parti ka të drejtë të zgjedhë kandidatin që e konsideron më të përshtatshëm dhe përfaqësues të denjë të saj. Ai i cilësoi si të pabazuara në parim tentativat për t’ua imponuar kandidatët subjekteve të tjera politike.
Sipas tij, rrugëdalja nga bllokada kërkon uljen e partive në tryezë, seriozitet, bashkëpunim, konsensus dhe kompromise për ta konstituuar parlamentin. Ai vlerësoi se arsyetimet e LVV-së janë deklarime politike që prodhojnë pasoja negative dhe se kandidati i propozuar nga një subjekt relevant duhet të kalojë përmes kompromisit.
Kryeziu paralajmëroi se mungesa e PDK-së, LDK-së apo kandidatëve të pakicave do ta pamundësonte konstituimin e Kuvendit. Një situatë e tillë, sipas tij, vetëm sa do të zgjasë procesin dhe do të krijojë tensione, si brenda skenës politike ashtu edhe në shoqëri.
Duke folur për mundësitë në rast të vazhdimit të vonesave, ai tha se Gjykata Kushtetuese mund ta sqarojë situatën pasi të përfundojë afati 30-ditor për konstituimin e Kuvendit, sidomos pas paralajmërimeve të PDK-së se çështjen mund ta dërgojë në këtë institucion.
Sipas interpretimit të tij, Gjykata mund ta rikthejë procesin e konstituimit në pikën zero ose të gjejë një mekanizëm që çon në shpërndarjen e plotë të legjislaturës së njëmbëdhjetë dhe në zgjedhje.
Kryeziu tha se çështjet e gjykuara nuk rigjykohen, të cilat në terminologjinë juridike njihen si res judicata. Megjithatë, ai vlerësoi se është dashur të paraqitej kërkesë në Gjykatën Kushtetuese për sqarimin e aktgjykimit të vitit 2025 lidhur me pasojat e moskonstituimit të parlamentit brenda 30 ditëve.
Ai theksoi se Gjykata mund të japë sqarim për atë se çfarë duhet të ndodhë pas 7 gushtit, nëse Kuvendi nuk konstituohet. Sipas tij, deputetët kanë të drejtë ta dërgojnë çështjen në Kushtetuese, e cila mund ta kthejë situatën në pikën zero, të mundësojë konstituimin e ri të parlamentit ose të përcaktojë një mekanizëm për shkuarje në zgjedhje.
Ish-anëtari i Gjykatës Kushtetuese dha edhe qëndrimin e tij për mandatin e ushtrueses së detyrës së presidentes, Albulena Haxhiu.
Ai tha se, nëse Kuvendi konstituohet, institucionet nisin nga pika zero dhe Haxhiu do të ketë një mandat të ri gjashtëmujor si ushtruese detyre e presidentes.
Sipas Kryeziut, pretendimet se ushtrimi i detyrës së presidentit përfundon më 5 tetor nuk mbështeten juridikisht, pasi shteti nuk mund të mbetet pa institucione funksionale.
Ai e lidhi këtë çështje me nenin 11 të Kushtetutës, duke nënvizuar se shteti duhet të ruajë funksionimin institucional edhe në rrethana të jashtëzakonshme.
Kryeziu tha se me konstituimin e parlamentit dhe me të gjithë mekanizmat e tij, presidenti dhe kryetarja e parlamentit do të nisnin nga pika zero. Për këtë arsye, sipas tij, Haxhiu do të kishte edhe gjashtë muaj mandat.
Ai theksoi se qytetarët janë të lirë të japin interpretime të tjera, por ato, sipas tij, nuk kanë bazë juridike. Kryeziu shtoi se shteti nuk mund të mbetet pa udhëheqje dhe pa institucione, veçanërisht duke pasur parasysh nenin 11 të Kushtetutës dhe mundësinë e gjendjeve të jashtëzakonshme, përfshirë edhe rastet e luftës.
Kryeziu foli gjithashtu për ish-krerët e Ushtrisë Çlirimtare të Kosovës, të cilët po përballen me gjykim në Dhomat e Specializuara në Hagë.
Ai shprehu bindjen se ata do të lirohen më 16 shtator dhe tha se ish-krerët e UÇK-së do t’i rikthehen jetës së tyre politike dhe njerëzore.
Sipas Kryeziut, ata janë “çlirimtarët e fundit politikë të këtij shekulli”. Ai tha se shqiptarët e kanë pasur burgun si pjesë të historisë së tyre, por vlerësoi se luftëtarët e lirisë nuk dënohen në botën demokratike.
Ai përsëriti bindjen se ish-krerët e UÇK-së do të lirohen dhe do t’i kthehen jetës politike e njerëzore. Kryeziu përfundoi duke thënë se shpreson dhe është i bindur se më 16 të këtij muaji ata do të jenë të lirë, në Kosovën e lirë.
