Gjykata austriake ka dhënë dënimin me gjashtë vjet heqje lirie për një shtetas shqiptar 46-vjeçar, pasi e gjeti fajtor për një valë vjedhjesh në banesa në rajonin e Vorarlbergut.
Sipas hetimeve, gjatë muajve korrik dhe gusht të vitit të shkuar, ai depërtoi me forcë në nëntë apartamente. Shuma e parave dhe objekteve me vlerë të marra llogaritet të paktën 14 mijë euro, kurse dëmi i përgjithshëm, që përfshin edhe dëmtimet fizike të ambienteve, kap shifrën pranë 40 mijë eurove.
Të lidhura
None found
Mediat vendase raportojnë se i akuzuari ka një precedent të rëndë kriminal, pasi ka vuajtur dënime më herët në burgjet e Suedisë dhe Danimarkës. Kësaj radhe, gjurmët e ADN-së të mbledhura në vendet e ngjarjes i drejtuan autoritetet drejt tij.
Ai ishte vënë në shënjestër të një urdhër-arresti evropian dhe prej marsit të këtij viti qëndron në paraburgimin e burgut të Feldkirch-ut. Në seancën gjyqësore, i pandehuri u soll i shoqëruar me pranga për t’u ballafaquar me akuzat për nëntë grabitje.
Në praninë e trupit gjykues, ai ka shprehur keqardhje dhe dëshirën për të nisur një jetë ndryshe. Kur kryetarja e gjyqit e pyeti rreth planet për të ardhmen, 46-vjeçari përmendi fëmijët e tij. “Sigurisht që dua të ndryshoj, në fund të fundit kam dy fëmijë”, citohet të ketë thënë.
Pavarësisht qëndrimit pendues, ai nuk pranoi të mbulonte dëmin financiar për shumicën e rasteve. Prokuroria theksoi se dëmi nuk konsiston vetëm te vjedhja, por edhe te dyert e shkatërruara, xhamat e thyer dhe dëmet e tjera të shkaktuara gjatë hyrjes me dhunë.
Përtej humbjeve monetare, banorët e nëntë shtëpive janë përballur me një ndjenjë të thellë cenimi. Të prekurit raportojnë pasiguri dhe ankth nga fakti se të panjohur kanë hyrë në intimitetin e shtëpive të tyre dhe kanë kërkuar mes sendeve personale.
Në proces u aludua edhe për një bashkëpunëtor të mundshëm. I pandehuri deklaroi se nuk ishte i vetëm, por identiteti që ofroi doli të ishte i trilluar. Kjo ka penguar autoritetet të identifikojnë një person të dytë, ndaj hetimet mbeten të hapura.
