Gjykata Ndërkombëtare e Drejtësisë në Hagë pritet të nisë sot shqyrtimin e padisë së Nikaraguas ndaj Gjermanisë lidhur me eksportet e armëve drejt Izraelit. Managua e akuzon Berlinin se po ndihmon dhe po lehtëson gjenocidin ndaj palestinezëve në Rripin e Gazës.
Të lidhura
None found
Sipas argumentimit të Nikaraguas, dërgesat gjermane të armatimeve përbëjnë shkelje të Konventës për Parandalimin dhe Shtypjen e Krimit të Gjenocidit. Vendi pretendon se këto armë janë përdorur nga forcat e armatosura izraelite gjatë konfliktit në Gaza.
Gjermania i ka mohuar akuzat, duke i konsideruar të pabazuara. Autoritetet gjermane kanë kundërshtuar gjithashtu kompetencën e GJND-së për të gjykuar këtë çështje, ndërsa Izraeli nuk është pjesë e procesit gjyqësor.
Procedurat aktuale nuk përbëjnë përballjen e parë të Gjermanisë me një rast të tillë në këtë gjykatë. Në vitin 2024, Berlini fitoi fazën fillestare të shqyrtimit, pasi GJND-ja refuzoi kërkesën urgjente të Nikaraguas për ndalimin e menjëhershëm të eksporteve të armëve drejt Izraelit.
Megjithatë, gjyqtarët nuk e pranuan kërkesën gjermane për mbylljen e plotë të çështjes, duke vendosur që procedurat të vazhdonin.
Gjatë seancës së sotme, ekipi ligjor i Gjermanisë pritet të kërkojë ndërprerjen e mëtejshme të procesit, me arsyetimin se gjykata nuk ka juridiksion. Nikaragua pritet ta kundërshtojë këtë qëndrim.
Nuk është bërë ende e ditur se kur do të shpallet vendimi nga gjyqtarët e gjykatës së Kombeve të Bashkuara.
Padia e Nikaraguas ndaj Gjermanisë është çështja e dytë që lidhet me akuzat për gjenocid në Rripin e Gazës dhe që po trajtohet nga GJND-ja. Në fund të vitit 2023, Afrika e Jugut nisi një proces kundër Izraelit, ku më pas u përfshinë edhe shtete të tjera.
