Cristiano Ronaldo dhe Dejan Kulusevski do të jenë shokë skuadre te Juventusi në këtë sezon, por para se të luajnë së bashku me të njëjtën fanellë, janë përballur mbrëmjen e djeshme si kundërshtarë në ndeshjen Suedi-Portugali.
Sfidën e fitoi padyshim CR7, që shënoi të dy golat e takimit dhe u dha tre pikët luzitanëve, ndërsa pas ndeshjes nuk i kurseu komplimentet për mesfushorin e talentuar suedez, që prej ditës së sotme do ta ketë shok skuadre.
“Një talent i madh, më pëlqen shumë. Ka potencial dhe është një futbollist shumë i mirë. Do të na ndihmojë të fitojmë dhe të arrijmë objektivat tanë. Shpresoj të luajmë sa më shumë bashkë dhe të shënojmë sa më shumë gola”, tha Ronaldo për shokun e ri të skuadrës.
I menjëhershëm edhe reagimi i mesfushorit suedez, i cili vlerësoi shumë fjalët e mira të Cristiano Ronaldos dhe pranoi se deklarata të tilla shërbejnë si një “benzinë” për përmirësimin e tij të mëtejshëm.
“Janë pikërisht këto gjëra, që të bëjnë të punosh më shumë. Fjalë fantastike. Cristiano është një futbollist botëror, një shembull për t’u ndjekur dhe në çdo ndeshje e tregon që është më i miri. Jam me fat që do të jem shoku i tij i skuadrës, pasi do të mësoj shumë prej tij”, u shpreh Kulusevski.
