Detaje të tjera janë mësuar nga ngjarja tragjike që ndodhi në Malin me Gropa, tetë vite më parë.
Dëshmitari i mbrojtur ka treguar në Polici pjesë të tjera të historisë nga çastet e fundit të Eglantina Bucit.
I penduari i drejtësisë ka treguar se babi i vajzës, Faik Buci e kishte bërë planin për të vrarë vajzën.
Shpesh, ai e ndiqte me motor. Një ditë vajza sapo zbriti nga autobusi teksa shkonte tek shtëpia e xhaxhait të saj pa që i ati po e ndiqte. Për t’i shpëtuar i humbi nga sytë, mes njerëzve.
“Ditën që Shkëlzeni kreu vrasjen na mori të dyve në makinë. I kërkonte llogari Eglantinës. Do të më tregosh gjithçka ke bërë dhe do të lë rehat të shkosh. Vajza i tha se ja kishte treguar të gjitha. Kur po iknin për në Malin me Gropa, sapo kaluam gurotet, Eglantona më kërkoi ndihmë,” rrëfen dëshmitari.
Po ashtu, ai thotë se 23-vjeçarja i kërkoi ndihmë.
“Më tha ‘Foli këtij. Më ndihmo. Ky nuk është mirë, do bëj ndonjë gjë. Nuk është në terezi’.”
Shkëlzeni, sipas tij, i kërkoi llogari se pse kishte ikur nga shtëpia dhe e kishte pyetur se pse u mori lekë.
Ndërsa vajza i tha:
“Ju më martuat me një njeri që nuk e doja. Lekët mi morën se më droguan.”
Po ashtu, dëshmitari ka rrëfyer, se pas vrasjes, Shkëlzen Buci e kërcënoi me jetë.
“Më tha ‘iku një e mos të bëhen dy. Harroje këtë që pe e që ndodhi sot’.”
Më vonë, shton ai, e takoi edhe babai i vajzës i cili e kërcënoi me jetën e familjes.
“Më tha ‘Mos fol. Ke djalin për të rritur’.”
Kujtojmë këtu se Eglantina Buci është vrarë me plumb në kokë në Malin me Gropa. Ajo qëndroi aty e groposur, derisa një pjesë e eshtrave të saj u gjend nga disa gjuetarë.
Ngjarja ka ndodhur në vitin 2012 dhe të dyshuar kryesorë janë babai dhe vëllai i saj, ndërsa është zbardhur vetëm së fundmi.
