Çdo qytetar që dëshiron ta lëshojë shtetin në këtë periudhë, do të duhet të nënshkruajë dokument me të cilin do t’i ndalohet hyrja në tre muajt e ardhshëm.
Kjo është njëra nga masat që e ka sjellë qeveria në seancën e fundit, për mbrojtje nga përhapja e coronavirusit, transmeton Telegrafi Maqedoni.
Oliver Spasovski tha se shpallja e gjendjes së jashtëzakonshme, varet nga ajo se si do të jetë sjellja e qytetarëve dhe si do të zhvillohet situata më tej.
“Kur thamë se nuk duhet të ketë tubime dhe festa, e thamë se nuk mund dhe nuk duhet të ketë. Tani do të duhet të veprojmë me një regjim tjetër. Ne thamë mos udhëtoni, ndërsa një pjesë e qytetarëve para 4-5 ditëve udhëtuan për të shëtitur vetëm për të mos i humbur biletat. Për këtë arsye do të duhet të kemi masa tjera”, tha Spasovski në lidhje me shpalljen e gjendjes së jashtëzakonshme.
Ai ju bëri thirrje qytetarëve që t’i respektojnë masat dhe të jenë të ndërgjegjshëm.
