“Hashim Thaçi është në kundërshtim me Kushtetutën”

Ish-kryetari i Gjykatës Kushtetuese, Enver Hasani, ka thënë se afati i përcaktuar nga presidenti Hashim Thaçi ndaj Albin Kurtit që 48 orë të nominojë kandidatin/kandidaten për kryeministër të ardhshëm të Qeverisë së Republikës së Kosovës, është në kundërshtim me Kushtetutën.

Në një prononcim për Koha.net, Hasani ka thënë po ashtu se Thaçi s’ka të drejtë që t’i drejtohet Gjykatës Kushtetuese në rast se Kurti nuk e respekton këtë afat.“Presidenti i Republikës nuk mund të caktojë afate sepse procesi i formimit të institucioneve është një proces politik që bazohet në Kushtetutë. Presidenti duhet t’i përmbahet Kushtetutës, e cila në asnjë interpretim nuk i jep të drejtë Presidentit për vënie të afateve ultimative, kurse forcat politike kujdesen për formimin e vullnetit politik të qytetarit të Kosovës”, ka thënë ai.

Ai thotë se Kushtetuta dhe aktgjykimi i Gjykatës Kushtetuese për rastin VLAN e kanë bërë të qartë që herën e parë se Presidenti asnjë diskrecion nuk ka në çështjen e propozimit të mandatarit, kurse në të dytën raund ekziston një diskrecion që duhet të realizohet brenda kritereve mbizotëruese, gjithnjë duke respektuar vullnetin e shumicës së votuesve të Kosovës.
Hasani tutje ka shtuar se Thaçi nuk mund t’i drejtohet Gjykatës Kushtetuese lidhur me këtë çështje, duke shtuar se nuk ka të drejtë të marrë asnjë vendim që nuk është në përputhje me Kushtetutën dhe vendimin e Gjykatës Kushtetuese për rastin e VLAN-it.Sipas tij, ai duhet të pres dhe t’i lë të qetë forcat politike për të formuar vullnetin e ri të votuesit kosovar, në pajtim me Kushtetutën dhe sqarimet e dhëna në rastin VLAN.

“Në Gjykatë Kushtetuese mund të shkohet vetëm nëse ekziston një dekret i Presidentit të Republikës për emërim arbitrar të mandatarit pa propozimin e partisë fituese, i cili dekret më pastaj do të mund të sfidohej në Gjykatë Kushtetuese nga palët e autorizuara (Qeveria, Kuvendi, Avokati i Popullit). Nuk ka mënyrë tjetër për ta dërguar çështjen në Gjykatë Kushtetuese nga Presidenti dhe nga askush. Çdo caktim i mandatarit pa propozim të partisë fituese është arbitraritet i kulluar”, thuhet në përgjigjen e Hasanit për gazetën Koha Ditore.


Shtuar 6.01.2020 17:03