Myrto Uzuni lë gjurmë edhe në grupet e Europa Leagues, pasi ka shënuar në sfidën mes Ferencvaros dhe Betis, por goli i tij nuk mjaftoi për të shmangur humbjen e dytë të hungarezëve, në po kaq ndeshje të luajtura.
Sulmuesi kuqezi e nisi si titullar sfidën ndaj gjigantëve spanjollë dhe kur rezultati ishte 0-1, bëri presing e rikuperoi një top në gjysmëfushën kundërshtare, teksa më pas i vetëm me portierin, lëshoi një goditje mjaft të bukur nga jashtë zone, duke dërguar sferën në rrjetë.
Të lidhura
None found
Megjithatë 15 minuta nga fundi, futbollisti Wingo shënoi në portën e tij dhe u dha avantazhin spanjollëve, të cilët në shtesë shënuan edhe golin e tretë, për të vulosur fitoren, ndërsa Ferencvaros do të duhet të presë ende për të marrë pikët e para në grupet e Europa League.
Merr tre pikët e para në grup edhe Lazio, që ia doli të triumfojë me rezultatin 2-0 ndaj rusëve të Lokomotivës së Moskës, në një ndeshje të cilën bardhekaltrit e zgjidhën shumë shpejt me golat e Basic dhe Patric.
U konfirmua sërish titullar Thomas Strakosha, që pas asaj gafe në Turqi ndaj Galatasarayt, mbrëmjen e sotme u shfaq në formë mjaft të mirë dhe ruajti të paprekur rrjetën e portës së tij, ndërsa në fushë për 90 minuta ishte edhe i zakonshmi Elseid Hysaj, prej të cilit trajneri Sarri nuk ka ndërmend të heqë dorë.
