Sulmi seksist ndaj Dumës, Meta thirrje Ramës: Është nënë e një fëmije të mitur, kërko menjëherë ndjesë

Presidenti Ilir Meta ka reaguar pas sulmit të kryeministrit Edi Rama ndaj kandidatëve demokrtë, konkretisht ndaj politikanes Grida Duma.

Meta kërkon që Rama t’i kërkojë ndjesë publike Dumës dhe të tërheqë mbrapsh fjalorin ordiner të përdorur ndaj saj.

Kujtojmë se gjatë ditës së djeshme, Rama komentoi kandidatët e PD-së teksa nxori një foto provokuese dhe të montuar të Dumës, me komentin: Gridare, gridare ooo.

Reagimi i Metës

E dënoj me ashpërsi dhunën verbale dhe linçimin publik, të papranueshëm për traditën shqiptare dhe çdo shoqëri demokratike, të bërë ndaj zonjës, njëherazi nënë e një fëmije të mitur, Grida Duma.

Asnjë ndarje politike nuk mund t’i japë të drejtë revanshit të rrugaçërisë, për më tepër kur këto sulme të papranueshme për moralin njerëzor dhe etikën institucionale, konsumohen nga personat e veshur me autoritetin e shtetit.

Duke besuar në reagimin e fuqishëm të shoqatave që angazhohen për mbrojtjen e të drejtave të grave, i bëj thirrje Kryeministrit ende në detyrë, të kërkojë ndjesë publike dhe të tërheqë mbrapsht sulmin dhe fjalorin ordiner të përdorur ndaj zonjës Duma./albeu.com/


Shtuar 11.03.2021 12:03