Alfred Trebicka ishte i ftuar në Grida Duma Podcast, ku ndau mendimet e tij mbi protestat e të rinjve, marrëdhëniet mes brezave, ndikimin e artit në shoqëri dhe mënyrën se si qeveria po reagon ndaj studentëve.
Duke u mbështetur në përvojën e tij personale dhe profesionale, aktori foli hapur për një brez që, sipas tij, po shfaq pa ekuivok pakënaqësinë dhe dëshirën për ndryshim.
Të lidhura
None found
“Janë shpirtra të vrarë”, deklaroi Trebicka, duke vënë në diskutim përgjigjen që shoqëria dhe institucionet po u japin të rinjve. Në bisedën me Grida Dumën, ai kundërshtoi përdorimin e ashpërsisë ndaj protestuesve dhe shtroi pyetjen se pse zgjidhet dhuna, kur për menaxhimin e situatave të tensionuara mund të përdoren edhe rrugë të tjera ligjore.
“Si mund të godasin 15 policë dy të rinj?”, pyeti aktori, duke u ndalur te mënyra e trajtimit të studentëve që kanë dalë në protestë.
Trebicka përshkroi gjithashtu klimën e krijuar në Tiranë gjatë protestave, të cilën e lidhi me përvoja të ngjashme të jetuara në Kili, ndërsa tregoi se kishte ndier edhe pasojat e gazit lotsjellës. Për të, këto zhvillime nuk duhen parë thjesht si një përplasje e çastit, por në kuadrin e marrëdhënies mes pushtetit, shoqërisë dhe brezit të ri.
