Marta Kos në Shkup: Pa ndryshimet kushtetuese nuk nis hapi i ardhshëm drejt anëtarësimit në BE

Komisionerja e BE-së për Zgjerim, Marta Kos, deklaroi sot në Shkup se ndryshimet kushtetuese mbeten kushti i domosdoshëm i radhës për nisjen e procesit të anëtarësimit në Bashkimin Evropian. Ajo i bëri këto komente në një konferencë të përbashkët për shtyp me kryeministrin Hristijan Mickoski.

Duke iu përgjigjur pyetjeve të gazetarëve për garancitë që Qeveria e Maqedonisë së Veriut po kërkon për të vijuar me zbatimin e ndryshimeve kushtetuese, të nevojshme për fillimin e procesit substancial të negociatave për anëtarësim në BE, Kos tha se zgjerimi i BE-së nuk bazohet te garancitë e dhëna paraprakisht, por te besimi, angazhimet, përkushtimi, përmbushja dhe puna.

Ajo u shpreh se nuk është personi që mund të japë këshilla se si ndërtohet besimi me fqinjët, por theksoi se sa më i madh të jetë ky besim, aq më i lehtë bëhet përparimi në procesin e pranimit. Sipas saj, ky proces nuk përfshin vetëm anën teknike dhe reformat që duhen realizuar, por lidhet edhe me dinamikën politike në shtetet anëtare.

Kos nënvizoi se besimi mund të ndërtohet jo vetëm përmes fjalëve të mira, por edhe përmes veprave të mira. Sipas saj, kjo arrihet duke shmangur veprimet dhe deklaratat që mund të shtojnë tensionet, duke respektuar të drejtën ndërkombëtare, duke zgjidhur mosmarrëveshjet në mënyrë paqësore dhe duke bashkëpunuar për çështje të përbashkëta. Ajo shtoi se në BE ka shumë tema të tilla të përbashkëta.

Në fund, Marta Kos theksoi se ndërtimi i besimit ndihmon stabilitetin rajonal dhe se kjo nuk lidhet vetëm me një shtet anëtar, por me krijimin e besimit me të gjitha njëzet e shtatë shtetet anëtare, tha Kos./Telegrafi/