Kos: E ardhmja evropiane e Maqedonisë së Veriut lidhet me vendimet e politikanëve dhe ndryshimet kushtetuese

Maqedonia e Veriut duhet të miratojë ndryshimet kushtetuese për të vijuar rrugëtimin drejt Bashkimit Evropian, deklaroi sot komisionerja e BE-së për Zgjerimin, Marta Kos.

Pas takimit në Bruksel me zëvendëskryeministrin dhe ministrin e Maqedonisë së Veriut për Çështjet Evropiane, Bekim Sali, Kos tha se ndryshimet kushtetuese përbëjnë hapin e nevojshëm për vazhdimin e procesit të integrimit evropian, pa pasur nevojë për vendime të tjera politike, raportoi “BGNES”.

Ajo i kërkoi drejtpërdrejt qeverisë së Maqedonisë së Veriut të përmbushë angazhimin e saj dhe të procedojë me ndryshimet kushtetuese.

“Nuk ka shumë gjëra që duhen bërë. Ka shumë, por në thelb bëhet fjalë për një hap: ndryshimet kushtetuese. Kur ato të miratohen, do të mund të vazhdojmë përpara pa vendime të tjera politike. Prandaj, apeli im për qeverinë është: ju lutem, bëjeni dhe përmbushni detyrimin tuaj. Jam e bindur se më pas do të mund të ecim përpara, në interesin më të mirë të qytetarëve tuaj”, u shpreh ajo.

Sipas komisioneres evropiane, zhvillimet aktuale përbëjnë një mundësi për Maqedoninë e Veriut që të afrohet më tej me BE-në, veçanërisht duke parë përparimin e vendeve të tjera të Ballkanit Perëndimor.

“Shpresoj që shumë shpejt të nënshkruajmë marrëveshjen e pranimit me Malin e Zi. Edhe Shqipëria po shënon përparim të mirë. Ky është momenti i duhur që Maqedonia e Veriut të ecë përpara. Përmbushja e pritshmërive varet nga politikanët e Maqedonisë së Veriut”, deklaroi Kos.