Kryeministri i Maqedonisë së Veriut, Hristijan Mickoski shpreh pritshmëritë e tij për zhbllokimin e procesit të integrimit të vendit në Bashkimin Evropian (BE), pas vizitës së presidentes së Komisionit Evropian, Ursula von der Leyen, në gjashtë vendet e Ballkanit Perëndimor, përfshirë edhe Maqedoninë e Veriut.
Ai theksoi se pas takimeve të tij me përfaqësues ndërkombëtarë, do të bëhen analiza të hollësishme për të kuptuar se si do të funksionojë procesi i integrimit.
“Çdo gjë është në lëvizje. Po udhëtoj këtë fundjavë në Austri, do të jem pjesë e një ngjarjeje në Salzburg, më pas do të kem takime me përfaqësues të lartë të Qeverisë dhe shoqërisë austriake, presidentin, ministrin e Jashtëm. Më pas vjen presidentja e Komisionit Evropian, pastaj kemi një takim të Komunitetit Politik Evropian në Budapest më 7 nëntor, kështu që le të bëjmë një analizë për të parë se si do të funksionojë e gjithë kjo. Nëse arrijmë ta përmbushim qëllimin në këtë mënyrë, nuk do të ngutem për të marrë vendime”, deklaroi të premten Mickoski duke nënvizuar se diktatet për të nuk janë zgjidhje.
Mickoski u bëri thirrje qytetarëve për durim dhe theksoi se vendimet e nxituara në shumicën e rasteve nuk janë zgjidhja e duhur.
“Diktatet, për të qenë i qartë, nuk i pranoj. Për këtë proces është e nevojshme edhe mirëkuptimi nga BE-ja, e cila presim të tregojë të njëjtën besim në të ardhmen evropiane të rajonit tonë, siç është edhe besimi ynë”.
