Ministri i Mbrojtjes Niko Peleshi, ndërsa ka bërë bilancin e zjarreve në vend, ka thënë se Mbrojtja Civile do të modernizohet, në mënyrë që situata të tilla zjarresh si këtë verë të mos përsëriten herë të tjera.
“4.960 trupa dhe 152 mjete të FA, 3309 trupa dhe 113 mjete zjarrfikëse. 1.914 forca lokale të të gjitha bashkive, 1`.400 forca vullnetare, 4.89 forca të policisë së shtetit, 606 forcat e shërbimit pyjor dhe e gjithë administrata e mbrojtjes civile. Kjo ishte fuqia njerëzore dhe motorike e operacioneve nga toka për të luftuar me 389 vatra të zjarrit në të gjithë vendit në harkun e dy muajve. Ndërkohë për ndihmën nga ajri, iu bashkuan forcës sonë tre mjete helikopter nga Holanda, 2 mjete nga Çekia. E vyer ishte mbështetja e ofruar nga SHBA, me ekspertë që asistuan dhe e bënë më efektive operacionin. Në luftë për të mbrojtur së pari jetën dhe natyrën tonë, dy qytetarë, Andrea dhe Tatiana Haxhia humbën jetën, e 4 të tjerë u lënduan. Dëmet do të ishin edhe më të mëdha nëse nuk do të bëhej detyra e duhur dhe heroike e forcave tona.
Sa herë që ka operacione të mëdha vlerësimet nuk mund të jenë objektive, por do i lutesha të gjithëve që vlerësimet i përkasin gjithsecilit, ato kanë brenda simbolikën dhe mirënjohjen për të gjithë ata që punuan me dashuri të madhe për vendin. Kam takuar modele të shkëlqyera të punonjësve të shtetit, si perfekti i Vlorës, që më ka prekur kur e kam parë me net të tëra pa gjumë. Kur e kam parë duke marrë mjetet e të punojë si ushtarët, për t’i nxitur dhe ndihmuar në ato ditë. Janë mbi 3 mijë hektarë të prekura. Mbi 70% të tyre ishin shkurre, kjo do të thotë që kemi shmangur më të keqen. Sot s’është një ditë falenderimesh, por edhe konkluzionet. Kjo përballje na ka treguar sa i domosdoshëm është modernizimi i Mbrojtjes Civile, ne po punojmë në këtë drejtim. Mbrojta Civile nuk është funksion i një strukture të vetme, ajo fillon nga komuniteti, e më pas në çdo institucion të përfshirë. Ne kemi një rol të pashmangshëm si Ministri e Mbrojtjes, për të bërë harmonizimin dhe për të vendosur në kontroll të gjitha kapacitetet. Para pak ditësh kemi realizuar për herë të parë një kontratë model të mirëmbajtjes së helikopterëve, do të ecim në këtë rrugë.
Jemi një vend aleat të NATO-s. Kryeministri na ka inkurajuar për të qenë sa më profesionistë në kontratat tona për të cilat kujtohemi a herë që përballemi. Është rasti të mbajmë shënime dhe të rikthejmë në punë të përditshme rrezikun ndaj emergjencave. Jam i bindur që nuk do të bëjmë vetëm paradë vlerësimesh, por edhe meditim për të kuptuar se sa mbrapa jemi drejt harmonizimit dhe bashkimit të të gjitha forcave. Na duhet të reflektojmë dhe kemi shumë punë për të korrigjuar” tha Peleshi./albeu.com
