Sipas një raportimi të “New York Times”, i cili mbështetet në burime konfidenciale, presidenti amerikan Donald Trump ndryshoi në momentin e fundit aeroplanin e tij presidencial gjatë kthimit nga samiti i NATO-s në Ankara, në fillim të korrikut. Arsyeja ishte një alarm për rrezik të mundshëm nga Irani.
Të lidhura
None found
Trump kishte udhëtuar drejt kryeqytetit turk me një Boeing 747-8, një dhuratë nga Katari. Ky aeroplan modern nuk ishte i kompletuar me pajisjet e sofistikuara të sigurisë që zotëron modeli klasik i Air Force One, shkruan e përditshmja amerikane.
Burimet pohuan se sinjali i kërcënimit u kap teksa Trump merrte pjesë në samit. Menjëherë pas një njoftimi nga Shërbimi Sekret, ai mori vendimin të mos e përdorte më avionin e ri për fluturimin e kthimit.
Për publikun, megjithatë, presidenti dha një shpjegim tjetër. Ai deklaroi se ndërrimi i mjetit fluturues u krye për t’i lejuar trupave amerikane të stacionuara në Britaninë e Madhe të admironin nga afër aeroplanin e ri presidencial.
Pasi u nis nga Turqia me Air Force One-in e vjetër, Trump mbërriti në Mbretërinë e Bashkuar dhe më pas kaloi sërish në bordin e avionit të ri për të përfunduar itinerarin drejt Uashingtonit.
“The New York Times” kishte ngritur shqetësime edhe më parë gjatë muajit, duke raportuar se zyrtarët amerikanë kishin rezerva për kapacitetet mbrojtëse të aeroplanit të ardhur nga Katari.
Pas daljes në dritë të këtyre të dhënave, autoritetet amerikane filluan një hetim për rrjedhjen e informacionit. Në kuadër të tij, u kërkuan dëshmi disa gazetarëve përpara një jurie, si dhe u kërkua që ata dhe familjarët e tyre të dorëzonin regjistrat e thirrjeve telefonike.
Gjatë fundjavës së kaluar, vetë Trump konfirmoi se avionit të ri i mungojnë ende disa funksione jetike mbrojtëse, të pranishme në versionet e mëparshme të “Air Force One”, përfshirë këtu edhe sistemin kundër raketave.
