Vajzat që ranë mbrëmë nga kati i katërt i një banese në Ferizaj janë motra. Zëdhënësi i Policisë së Ferizajt, Kanun Veseli, tha se rasti në polici është hapur si vetëvrasje, ndërsa 18-vjeçarja ka tentuar ta shpëtojë motrën e saj 15-vjeçare e cila pas plagëve të marra ka vdekur.
Vajza 18-vjeçare e cila kishte bërë përpjekje për ta shpëtuar motrën e saj të mitur po trajtohet në QKUK dhe e njëjta ka pësuar lëndime të rënda trupore.
Këto informacione i dha për Express zëdhënës i policisë për rajonin e Ferizajt, Kanun Veseli.
“Rasti është hapur si vetëvrasje. E ndjera ka tentuar të hidhet, në përpjekje për ta shpëtuar motra tjetër kanë rënë të dyjat”, tha ai.
Për këtë rast policia është njoftuar mbrëmë rreth orës 21:35.
“Policia ka pranuar një informacion se në rrugën “Sandër Prosi” në Ferizaj, dy vajza të moshës 18 dhe 15 vjet kanë rënë nga kati i 4-të i një objekti banesor dhe të njëjtat janë dërguar për ndihmë mjekësore në Qendrën Emeregjente në Ferizaj”.
Sipas policisë, vajzat në gjendje të rëndë shëndetësore janë dërguar për trajtim të mëtejshëm mjekësor në QKUK-Prishtinë.
Ku më pas është konfirmuar edhe vdekja e 15-vjeçares.
“Njëra nga të lënduarat Z.M (F/K) e moshës rreth 15 vjeçe për pasojë ka ndërruar jetë, kjo e konfirmuar nga mjekët, ndërsa e lënduar ka mbetur A.M (F/K) e moshës rreth 18 vjecare. Policia Rajonale e Ferizajt ,hetuesit dhe krimteknikët rajonal janë në vendin e ngjarjes dhe nën autorizim të prokurorit kujdestar nga Prokuroria Themelore e Ferizajt po e hetojnë rastin”, ka konfirmuar zëdhënësi Veseli./Albeu.com/
