Kryeministri Edi Rama ka komentuar për televizionin francez “France24” protestën e zhvilluar kundër projektit në Zvërnec.
Gjatë intervistës për këtë media, Rama deklaroi se sipas tij në këtë protestë ka një numër të madh ndërhyrjesh.
Të lidhura
None found
“Saktësisht për çfarë po ndodh. Ka shumë ndërhyrje, qoftë ndërhyrje nga Irani, me të cilin jemi në një luftë kibernetike që prej tri vitesh ose ndërhyrje nga konkurrentët në të gjithë rajonin që nuk e duan këtë zhvillim në Shqipëri”, u shpreh Rama.
Ai shtoi se, përveç këtyre, ekzistojnë edhe shqetësime të tjera nga një pjesë e popullsisë, e cila kërkon gjëra të ndryshme, por nënvizoi se qeveria është zgjedhur për të realizuar premtimet e saj, ku përfshihet edhe ky projekt.
“Siç e thashë, janë dhe të gjitha shqetësimet e tjera të një pjese të popullsisë që duan gjëra të ndryshme, por ne u zgjodhëm për të bërë atë që premtuam dhe midis premtimeve është ky projekt”, theksoi Rama.
Më tej, ai e cilësoi interesante faktin që protestat po zhvillohen në Tiranë, ndërkohë që në Vlorë, aty ku është planifikuar të ndërtohet projekti, sipas tij qytetarët e mbështesin atë.
“Është shumë interesante, sepse në Tiranë ka protesta, ndërsa në Vlorë, ku është parashikuar të bëhet projekti, njerëzit e duan atë”, shtoi ai.
