Aktivistë dhe qytetarë u mblodhën këtë të mërkurë në Tiranë për të protestuar, ndërsa presidentja e Komisionit Europian, Ursula von der Leyen, ndodhej në kryeqytet për takimin me kryeministrin Edi Rama.
Policia vendosi një perimetër sigurie dhe nuk i lejoi protestuesit t’i afroheshin Kryeministrisë. Gjatë përplasjes mes qytetarëve dhe efektivëve u shënuan edhe momente tensioni.
Të lidhura
None found
Aktivistja Sidorela Vatnikaj kundërshtoi kufizimin e protestës dhe tha se mesazhi i tyre për Ursula von der Leyen është që Bashkimi Europian të mos mbështesë, sipas saj, liderë autokratë.
“Rama nuk na përfaqëson. Kemi 122 ditë në protestë që themi se Rama dhe qeveria nuk na përfaqësojnë. Në BE vetëm nëse largojmë autokratët. Jemi këtu për t’i thënë Von der Leyen se nuk duhet të mbështesë autokratët”, deklaroi Vatnikaj.
Duke folur për numrin e madh të forcave të rendit dhe pamundësinë e protestuesve për t’iu afruar selisë së qeverisë, ajo e cilësoi situatën si të ngjashme me një burg.
“Po e kthejnë Shqipërinë në 313”, u shpreh aktivistja, duke iu referuar burgut të Tiranës.
