Policia ka shoqëruar 5 persona të cilët janë përfshirë në incidentet e ndodhura ditën e sotme në qytetin e Elbasanit.
Me dhjetra militantë të Partisë Socialiste dhe Partisë Demokratike u konfrontuan fizikisht me njëri-tjetrin, duke e kthyer sheshin “Aqif Pasha” në një arenë përleshjesh në Ditën e Verës.
Në një moment situata u përshkallëzua duke kaluar nga sharjet e ofendimet tek përplasja fizike, ku disa persona kanë qëlluar me grushte e shkelma njëri-tjetrin.
Përleshja ndodhi ndërsa kryeministri Edi Rama dhe kryedemokrati Lulzim Basha mbërritën në qytet në orare të njëjta, çka nxiti kaos dhe mungesë vetëpërmbajtje te turma.
Atmosfera ishte e tensionuar që në fillim, ku kryeministri u prit me protestë, ku mbështetësit e PD-së thërrisnin fjalët: “Rama ik!”, “Rama zhduku”, apo “Qen bir qeni”.
