Policia e Shtetit ka përmbyllur faza të reja të operacionit ndërkombëtar “The Wanted”, në koordinim me autoritetet partnere në Spanjë, Rumani dhe Mbretërinë e Bashkuar. Si rezultat, janë arrestuar dhe ekstraduar drejt Shqipërisë dy persona të shpallur në kërkim nga drejtësia shqiptare.
Nga Mbretëria e Bashkuar, nëpërmjet bashkëpunimit të Interpol Mançesterit me Interpol Tiranën, u ekstradua shtetasi Xhuljano Hoxha, 31 vjeç, lindur në Berat.
Të lidhura
None found
Hoxha kërkohej nga SPAK, ndaj tij ishte caktuar masa e sigurisë “Arrest me burg” në prill 2024. Ai dyshohet për pjesëmarrje në grup të strukturuar kriminal me qëllim kultivimin dhe shitjen e lëndëve narkotike. Çështja lidhet me operacionin e zhvilluar më 10 nëntor 2022 në fshatin Drenovicë të Beratit.
Ndërkohë, në Rumani u arrestua Aurel Hoxhallari, 49 vjeç, i lindur në Tiranë, i cili do të ekstradohet në Shqipëri.
Hoxhallari ishte shpallur në kërkim nga GJKKO që prej prillit të vitit 2018 për veprat penale “vrasje me paramendim”, “grup i strukturuar kriminal” dhe “mbajtje pa leje e armëve e drogës”. Sipas akuzës, më 29 janar 2018, në rrugën “Kongresi i Manastirit” në Tiranë, ai, në bashkëpunim me një shtetas grek dhe persona të tjerë, vrau me armë zjarri shtetasin D. K. Gjatë kontrolleve në banesat e anëtarëve të grupit, policia sekuestroi 9 armë zjarri dhe 130 kg kanabis.
