Presidenti Ilir Meta ka reaguar pas deklaratave të sotme të kryeministrit Edi Rama për zgjedhjen e një presidenti “normal” siç e quajti ai.
Në studion e Quo Vadis, Meta theksoi se ka qenë Rama që ka insistuar për ta zgjedhur president, ndërsa shton se në këto vite u ka qëndruar besnik deklaratës që ka bërë në Parlament, ku mes pushtetit dhe demokracisë do zgjidhte këtë të fundit.
Meta me ironi i uroi suksese Ramës në përpjekjet e tij për të gjetur presidentin e ri.
“Unë nga socialistët jam propozuar. Unë e kam mbajtur edhe angazhimin e tij por edhe i kam qëndruar besnik asaj që kam thënë në Parlament kur jam zgjedhur, që mes pushtetit dhe demokracisë do zgjedh demokracinë. I uroj suksese në këto përpjekje për t’i rritur dinjitetin parlamentit siç ia ka shtuar prej vitesh bashkive, siç ja ka shtuar dhe drejtësisë e sidomos tani presidenit pas zgjedhjeve të 25 prillit, kur kjo mazhorancë e ka mundësi të kapë edhe këtë institucion”, tha Meta.
