Shqipëria synon të përfundojë mbylljen e kapitujve të negociatave me Bashkimin Evropian në vitin 2027, por për të arritur këtë objektiv duhet të përmbushë ende detyra të rëndësishme, veçanërisht në përballjen me korrupsionin.
Kryetari i Komisionit për Çështjet Evropiane në Bundestagun gjerman, Anton Hofreiter, e bëri këtë vlerësim gjatë vizitës së tij në Tiranë, në një intervistë për DW. Ai theksoi se SPAK-u duhet të ushtrojë detyrën i pavarur nga politika, duke kërkuar që të mos ketë ndërhyrje as përmes deklaratave publike. Sipas tij, respektimi i standardeve mjedisore është gjithashtu pjesë e shtetit të së drejtës dhe Shqipëria nuk duhet t’u japë kundërshtarëve të anëtarësimit në BE arsye për ta bllokuar procesin.
Të lidhura
None found
DW: Shqipëria është përballur me një prej protestave më të mëdha në historinë e saj për mbrojtjen e mjedisit. Si e vlerësoni këtë protestë?
Anton Hofreiter: Këndvështrimi im është i qartë. Shqipëria, ashtu si shumica dërrmuese e qytetarëve të saj, dëshiron anëtarësimin në Bashkimin Evropian. Për të hyrë në BE, një vend duhet të zbatojë ligjet evropiane, të cilat mbështeten para së gjithash te shteti i së drejtës. Mbrojtja e mjedisit është gjithashtu pjesë e këtij parimi. Për këtë arsye, mesazhi im është që shteti i së drejtës duhet respektuar.
DW: Çfarë ndryshimesh të prekshme pret Gjermania nga Shqipëria përpara anëtarësimit të plotë në Bashkimin Evropian?
Anton Hofreiter: Prioriteti kryesor është vijimi i përpjekjeve kundër korrupsionit. Po aq të rëndësishme janë liria e shprehjes, demokracia dhe shteti i së drejtës. Krahas tyre, vendi duhet të përmbushë edhe detyrime teknike, përfshirë sigurinë ushqimore, si dhe çështje të tjera politike që lidhen me mjedisin. Shqipëria ka nevojë për investime dhe është e drejtë e saj të tërheqë investitorë, por çdo investim duhet të jetë në përputhje me legjislacionin evropian nëse synimi është anëtarësimi në BE.
DW: Sipas statistikave, korrupsioni vazhdon të jetë një problem i madh në Shqipëri. A mund të ndikojë kjo në ritmin e negociatave?
Anton Hofreiter: Korrupsioni është një shqetësim i pranishëm në shumë vende. Në Shqipëri kemi parë edhe hetime e raste të nivelit të lartë, dhe kjo mund të shihet si një zhvillim pozitiv, sepse tregon se askush nuk është mbi ligjin. Në të njëjtën kohë, presim që SPAK-u të ketë mundësi ta kryejë punën e tij dhe që politika të mos ushtrojë asnjë lloj ndikimi, madje as përmes deklaratave. Duhet theksuar qartë se lufta kundër korrupsionit është ndër çështjet më të rëndësishme për çdo shtet që kërkon anëtarësimin në Bashkimin Evropian.
DW: Në ç’mënyrë mund ta mbështesë Gjermania Shqipërinë në rrugëtimin e saj drejt BE-së?
Anton Hofreiter: Gjermania e mbështet fuqimisht Shqipërinë, si në fushën e legjislacionit dhe të infrastrukturës, ashtu edhe përmes ndihmës financiare dhe këshillimit. Arsyeja është se ne duam që Shqipëria të bëhet pjesë e Bashkimit Evropian. Megjithatë, puna që mbetet është e madhe dhe përfundimi i të gjithë kapitujve deri në fund të vitit të ardhshëm do të ishte një objektiv shumë ambicioz. Ne do të vijojmë ta ndihmojmë vendin, por qeveria dhe parlamenti duhet të punojnë ende shumë, si për miratimin e legjislacionit, ashtu edhe për zbatimin e tij.
DW: Ju e cilësoni vitin 2027 si një afat shumë ambicioz për mbylljen e kapitujve. Sa i arritshëm është ky synim?
Anton Hofreiter: Ky objektiv është i mundur. Por pas tij do të duhet të zhvillohet edhe procesi i ratifikimit, së bashku me të gjitha çështjet e tjera që lidhen me këtë procedurë. Për këtë arsye, rruga më e mirë për politikanët dhe për të gjithë ata që duan anëtarësimin e Shqipërisë në BE është të kryejnë sa më mirë detyrat e tyre. Brenda Bashkimit Evropian ka edhe persona që nuk e mbështesin anëtarësimin e Shqipërisë, veçanërisht populistë të krahut të djathtë. Nëse nuk u jepen argumente kundër këtij anëtarësimi, atëherë miqtë e Shqipërisë, mes të cilëve e konsideroj edhe veten time, e kanë më të lehtë të sigurojnë shumicat e nevojshme që vendi të bëhet realisht pjesë e Bashkimit Evropian. Prandaj, thirrja ime për të gjithë politikanët është ta bëjnë punën e tyre sa më mirë. Kjo do të krijonte mundësinë që Shqipëria të anëtarësohej në Bashkimin Evropian.
