Gjiknuri në kontradiktë me Ramën: Berisha është realitet politik, nuk mund ta mohojmë

Ndërsa kryeministri Edi Rama e cilëson të vdekur politikisht Sali Berishën, Sekretari i Përgjithshëm i PS-së e quan realitet politik që nuk mund ta mohojmë.

Numri dy i PS-së, Damian Gjiknuri e ka bërë këtë deklaratë në studion e emisionit “Kjo Javë”, ku ndër të tjera komentoi dhe situatën politike në PD, për të cilën tha se do të duhen shumë vite ta rigjejë veten.

“Me muaj kam thënë që opozita është në një situatë të rëndë, në një shkërrmoqje për dinamikën politike. Opozita tashmë është e përçarë nuk na vjen mirë por nuk është problemi ynë.

Ndodhet në një situatë shumë të rëndë.

E para se nuk arriti të krijojë një lidership pas ikjes së Berishës në 2013.

E dyta është që kemi një marrëdhënie të thyer të një djali të adoptuar ndaj një babai politik, pra Basha dhe Berisha, që u kthye në një dashuri të thyer në një urrejtje që shkatërron gjithçka. Partia Demokratike ka një mungesë lidershipi.

Ka një pjesë e cila shkon pas Berishës, por për të kaluarën e tij dhe për non gratën që ka marrë, nuk premton të ardhmen sipas meje.

Nga krahu, forcat pak më të moderuara të shkëputura nga ata, nuk kanë një lidership. PD do të ketë një periudhë shumë të vështirë.

Ndërsa në lidhje me zgjedhjet e PD nesër për kreun e partisë, mund të them që është zgjedhja e demokratëve.

Berisha është realitet politik dhe nuk mund ta mohojmë.

Por nga pikëpamja politike për demokratët nuk premton asgjë dhe do ketë kapacitete të cunguara për të arritur vendimmarrje dhe marrëveshje në dobi të këtij vendi, se Shqipëria është e ndërlidhur me interesat euroatlantike, jemi një vend i vogël i ndërvarur.

PD do djersijë shumë vite derisa të gjejë vetveten”, tha Gjinuri./albeu,com

Shtuar 21.05.2022 18:37