Kodrat me ullishte në Gorishovë, pjesë e njësisë administrative Cakran në bashkinë Fier, janë përfshirë nga një zjarr i përmasave të mëdha gjatë mesditës së sotme.
Era e fortë ka ndihmuar përhapjen e flakëve në një zonë të gjerë me shkurre, ullinj dhe masiv pyjor. Banorët janë alarmuar nga situata, por zjarri ndodhet larg vendbanimeve.
Të lidhura
None found
Ekipet zjarrfikëse kanë mbërritur në vendngjarje dhe po punojnë për izolimin e vatrave dhe shuarjen e flakëve. Ndërhyrja po vështirësohet nga terreni i thyer dhe kushtet atmosferike, të cilat favorizojnë vijimin e përhapjes së zjarrit.
Bëhet fjalë për zjarrin e dytë masiv në zonën e Cakranit brenda dy ditësh. Një ditë më parë, flakët përfshinë kodrat e Kreshpanit, ku u dogjën rreth 2 mijë rrënjë ullinj dhe një sipërfaqe e konsiderueshme toke.
Autoritetet po vijojnë ndërhyrjen në terren, me synim kontrollin e situatës dhe ndalimin e përhapjes së mëtejshme të zjarrit.
