Banorët e një qyteti gjerman pranë kufirit me Belgjikën janë këshilluar nga bashkia që të largohen, pasi një zjarr i madh në një zonë pyjore belge po përparon në drejtim të Gjermanisë.
Të lidhura
None found
Sipas autoriteteve të Monsaut, vatra e zjarrit ndodhet aktualisht 1.5 kilometra nga kufiri gjerman dhe 1.8 kilometra nga zona e banuar më e afërt.
Zjarrfikësit punuan përgjatë gjithë natës në përpjekje për të vënë nën kontroll zjarrin më të madh pyjor të regjistruar ndonjëherë në Belgjikë. Flakët nisën mesditën e së premtes në parkun natyror malor Fagnes, në Belgjikën perëndimore, dhe po lëvizin drejt Gjermanisë.
Autoritetet vendore bëjnë të ditur se nga zjarri janë shkatërruar 30,000 hektarë.
Bashkia e qytetit, i cili ka rreth 12,000 banorë, paralajmëroi se edhe në rast se flakët nuk hyjnë në territorin gjerman, tymi pritet të shkaktojë ndotje të konsiderueshme të ajrit.
“Për këtë arsye, banorëve të zonave pranë kufirit u është dhënë rekomandimi që të evakuojnë këto zona”, deklaroi bashkia.
Ndërkohë, autoritetet belge kanë urdhëruar evakuimin e qytetit të Kuchelscheid, që ndodhet 10 minuta larg me makinë nga Monschau.
