Donald Trump është kthyer në SHBA pas samitit të NATO-s, i cili nga media të njohura si CNN u vlerësua si një takim që u mbyll “me nota pozitive”.
Të lidhura
None found
Sipas CNN, teksa liderët europianë hynin në mbledhjen e së mërkurës, atmosfera paraqitej e rënduar. Trump ndodhej pak jashtë hyrjes së sallës së konferencës dhe shprehte me irritim një sërë pakënaqësish ndaj NATO-s, duke përmendur që nga pengesat ndaj pretendimeve për Groenlandën deri te kundërshtimi i Spanjës për të vënë në dispozicion bazat e saj për luftën kundër Iranit.
E njëjta media shkruan se homologët e Trumpit ishin përgatitur për një qortim të fortë, të cilin shumëkush e priste në këtë samit, por një gjë e tillë nuk ndodhi.
Në përfundim, sipas CNN, Trump u shfaq më i butë sesa kishte qenë para kamerave. I vendosur në tryezën e rrumbullakët, ai nuk foli fare për Groenlandën dhe as për Spanjën, megjithëse shprehu ankesën se vendet e përfaqësuara në konferencë nuk e kishin mbështetur përballë Iranit.
Edhe pse shfaqi pakënaqësi edhe për situatën e marrëveshjes me Teheranin, duke deklaruar se ajo tashmë ishte praktikisht rrëzuar pas sulmeve të Iranit ndaj disa anijeve në Ngushticën e Hormuzit, ai nuk e përsëriti kërcënimin për tërheqjen e plotë të Shteteve të Bashkuara nga NATO-ja.
Përkundrazi, Trump u duk i interesuar teksa liderët paraqitën angazhimet e tyre për të rritur investimet në mbrojtje. Kjo atmosferë më e favorshme bëri që samiti të shihej si i suksesshëm. Nga ky takim pati lajme pozitive edhe për Shqipërinë.
Nga Ankaraja, Sekretari i Përgjithshëm i NATO-s, Mark Rutte, e konfirmoi zyrtarisht se Shqipëria do të presë samitin e ardhshëm të Aleancës.
Në Tiranë do të mblidhen gjatë vitit 2027 liderët e 32 vendeve anëtare, ndërsa data dhe periudha e saktë e zhvillimit të samitit do të përcaktohen më vonë, pas konsultimeve mes aleatëve.
