Donald Trump e promovoi rënien më të madhe të çmimeve të barnave me recetë në Shtetet e Bashkuara në më shumë se 60 vjet si një arritje të administratës së tij, duke u shfaqur me një artikull të Washington Post në duar.
Megjithatë, vetë shkrimi që presidenti amerikan zgjodhi të ekspozonte publikisht jepte një tablo tjetër: një pjesë e konsiderueshme e uljes së çmimeve lidhej me masat e miratuara kur Joe Biden ishte president.
Të lidhura
None found
Gjatë një aktiviteti, Trump ua tregoi artikullin gazetarëve dhe i ftoi ata t’i kushtonin vëmendje titullit.
“Titulli kryesor i sotëm është pikërisht ky. A e patë?”, deklaroi ai. Më pas lexoi rreshtat e parë dhe vijoi: “Në rregull, e kuptuat? A e kuptuan të gjithë? Ju thashë se kjo do të ndodhte”.
Presidenti u kërkoi gjithashtu gazetarëve që lajmin ta përhapnin më tej.
Edhe Shtëpia e Bardhë i dha një vëmendje të madhe këtij momenti, duke publikuar një fotografi të Trump teksa mbante faqen e gazetës ku dukeshin titulli dhe pjesa hyrëse e artikullit.
Ndonëse Trump e përdori titullin si provë për efektin e politikave të tij, Washington Post vinte në dukje se ulja e çmimeve të barnave mund t’i atribuohej kryesisht një politike të miratuar nga administrata Biden.
Kjo politikë është Akti i Reduktimit të Inflacionit, i miratuar në vitin 2022. Përmes këtij ligji, programi Medicare fitoi të drejtën të negocionte drejtpërdrejt me kompanitë farmaceutike çmimet e disa prej barnave me recetë më të kushtueshme dhe më të përdorura.
Çmimet e para të reduktuara si rezultat i këtyre negociatave nisën të zbatoheshin në fillim të vitit 2026.
Të dhënat e Indeksit të Çmimeve të Konsumatorit treguan se në korrik çmimet e barnave me recetë u ulën me 3.1%. Kjo ishte rënia më e madhe vjetore e regjistruar në më shumë se gjashtë dekada.
Shifrat u publikuan nga Byroja e Statistikave të Punës (BLS). Trump e kishte shkarkuar drejtorin e kësaj agjencie një vit më parë, pas publikimit të të dhënave për tregun e punës që rezultuan më të dobëta nga sa pritej. Në atë periudhë, presidenti i quajti shifrat “të rreme”.
Ekspertët e politikave shëndetësore kanë shprehur dyshime se ulja e çmimeve është kryesisht fryt i masave të ndërmarra nga administrata Trump.
Richard Frank, profesor i ekonomisë shëndetësore në Universitetin e Harvardit, i tha Washington Post se, nëse do t’i duhej të veçonte faktorin me peshën më të madhe, do të përzgjidhte ndërhyrjet e lidhura me Aktin e Reduktimit të Inflacionit dhe jo nismat e administratës aktuale.
Një vlerësim të ngjashëm dha Stacy Dusetzina, profesore e politikave shëndetësore në Universitetin Vanderbilt. Sipas saj, shpjegimi më i mundshëm për rënien e çmimeve është ligji i miratuar gjatë presidencës së Biden.
Deri në këtë fazë, negociatat për çmimet kanë përfshirë vetëm 10 barna. Dusetzina nënvizoi, megjithatë, se ato përdoren gjerësisht dhe se ulja e çmimeve të tyre mund të ndikojë ndjeshëm në indeksin e përgjithshëm të barnave me recetë.
Pavarësisht asaj që thuhej në artikull, zyrtarët e Shtëpisë së Bardhë vazhduan ta cilësonin rënien e çmimeve si rezultat të politikave të Trump.
Drejtori i komunikimit i Shtëpisë së Bardhë shkroi në rrjetin social X: “Gjithçka falë Presidentit Trump!”
