Liqeni i Zyrihut ka shënuar nivelin më të ulët të ujit të regjistruar në 75 vjet, bëri të ditur të mërkurën Zyra Federale për Mjedisin (OFEV), ndërsa Zvicra vijon të përballet me një thatësirë të rëndë.
Sipas të dhënave të OFEV-së, situata e thatësirës është shfaqur që në pranverë dhe është shkaktuar nga reshjet dukshëm më të pakta se mesatarja shumëvjeçare, si dhe nga temperaturat që në shumë raste kanë qenë mbi vlerat normale për këtë periudhë.
Të lidhura
None found
Autoriteti federal njoftoi se mungesa e reshjeve ka tharë tokat dhe ka ulur nivelin e ujërave sipërfaqësore e nëntokësore. Gjendja është rënduar më tej gjatë javëve të fundit.
Për pasojë, shumë liqene në Zvicër po regjistrojnë nivele nën mesataren sezonale. Ndër to janë Liqenet e Konstancës, Walenit, Zyrihut dhe Zugut, Liqeni Maggiore, si edhe disa liqene më të vegjël, të cilët kanë nivele jashtëzakonisht të ulëta për këtë periudhë të vitit.
Megjithatë, një zëdhënës i OFEV-së për AFP deklaroi se vetëm Liqeni i Zyrihut ka arritur rekordin më të ulët të regjistruar ndonjëherë.
Të mërkurën, matësi në Zurichshorn tregoi një nivel prej 404.5 metrash mbi nivelin e detit. Kjo shifër tejkalon rekordin e mëparshëm prej 405.46 metrash, i shënuar në vitin 1952, një vit pas nisjes së matjeve në këtë stacion.
OFEV paralajmëroi se rënia e theksuar e niveleve të ujit mund të shkaktojë probleme për lundrimin, infrastrukturën portuale dhe pikat e zbarkimit. Sipas autoriteteve, mund të preken gjithashtu aktivitetet rekreative në ujë dhe përgjatë brigjeve të liqeneve.
Pasojat kanë filluar të shfaqen edhe në transportin ujor. Kompania Ferry-lac Zurich, që lidh Horgenin në bregun perëndimor me Meilenin në bregun lindor të liqenit, ka njoftuar pasagjerët për kufizime në transportin e automjeteve.
Kompania shpjegoi se niveli “jashtëzakonisht i ulët” i ujit e ka detyruar të përdorë rampa të posaçme për ngarkimin dhe shkarkimin e automjeteve.
