Pas sulmit me armë në një shkollë, ku një 14-vjeçar vrau tetë persona dhe më pas i dha fund jetës, Tajlanda ka ndërmarrë hapa për ashpërsimin e kontrolleve ndaj armëve të zjarrit.
Të lidhura
None found
Kryeministri Anutin Charnvirakul ka kërkuar zbatimin e menjëhershëm të masave që synojnë forcimin e kontrollit të armëve në mbarë vendin.
Ndër vendimet e marra është ndërprerja e përkohshme e lëshimit të lejeve të reja për blerjen e armëve. Njëkohësisht, do të rivlerësohen kërkesat që ndodhen ende në fazën e miratimit.
Qeveria do t’u japë fund edhe programeve përmes të cilave disa zyrtarë publikë mund të blinin armë me çmime më të ulëta. Autoritetet do të kontrollojnë dyqanet e armëve dhe dokumentacionin e shitjeve, ndërsa inspektimet do të përfshijnë edhe poligonet e qitjes, për të verifikuar zbatimin e rregullave mbi përdorimin dhe magazinimin e municioneve.
Masat parashikojnë gjithashtu goditje më të forta ndaj armëve të paligjshme, si dhe ndjekje penale më të rënda për personat që shkelin ligjin.
Ndryshimet më të thella ligjore pritet të kërkojnë më shumë kohë. Mes tyre përfshihen ashpërsimi i dënimeve për shkeljet, mbikëqyrje më e rreptë e municioneve dhe detyrimi për rinovimin më të shpeshtë të lejeve të armëve.
Ngjarja ndodhi javën e kaluar. Sipas autoriteteve, adoleshenti 14-vjeçar vrau në fillim gjyshërit e tij në banesën ku jetonte dhe më pas u drejtua për në shkollë, ku hapi zjarr.
Në ambientet e shkollës u vranë gjashtë persona të tjerë, ndërsa në fund sulmuesi kreu vetëvrasje.
Policia ka bërë të ditur se arma dyshohet se i përkiste gjyshit të tij. Hetuesit kanë konstatuar gjithashtu se 14-vjeçari ishte ekspozuar ndaj materialeve të dhunshme në internet dhe kishte shfrytëzuar rrjetet sociale për të mësuar mbi përdorimin e armëve.
Masakra ka rihapur në Tajlandë diskutimin për sigurinë në shkolla dhe pronësinë e armëve. Tajlanda renditet ndër vendet me nivelin më të lartë të pronësisë së armëve në Azinë Juglindore, ndërkohë që autoritetet po vlerësojnë masa të tjera për kufizimin dhe kontrollin e tyre.
Edhe Ministria e Arsimit pritet të përgatisë protokolle të reja për mbrojtjen e shkollave. Ato do të përfshijnë vlerësime të shëndetit mendor të nxënësve, mekanizma për identifikimin dhe referimin e rasteve të rrezikuara, trajnime për përballimin e emergjencave dhe masa kundër bullizmit.
