Pavarësisht tensioneve të fundit në Lindjen e Mesme, lëvizja e anijeve në Ngushticën e Hormuzit mbetet në pjesën më të madhe e pandikuar, sipas Sekretarit amerikan të Energjisë, Chris Wright, i cili bëri të ditur se gjatë 24 orëve të fundit në këtë pikë strategjike kanë kaluar 67 anije.
Në një intervistë për Fox News, Wright u shpreh se volumi i anijeve që transportojnë naftë dhe derivatet e saj vijon të jetë në nivele të afërta me ato që ishin përpara përshkallëzimit të krizës në rajon.
Të lidhura
None found
Këto deklarata u bënë një ditë pasi autoritetet iraniane njoftuan mbylljen e Ngushticës së Hormuzit për shkak të tensioneve ushtarake në Lindjen e Mesme. Megjithatë, Uashingtoni e hodhi poshtë menjëherë këtë pretendim, duke nënvizuar se qarkullimi detar vazhdon.
Ai bëri të ditur gjithashtu se korridori kryesor i lundrimit ende nuk është rihapur plotësisht, por se Shtetet e Bashkuara kanë vendosur një itinerar alternativ më në jug për të siguruar kalimin e anijeve tregtare.
“Ne kemi krijuar një korridor të veçantë në jug dhe po shoqërojmë anijet që kalojnë përmes tij”, deklaroi ai.
Sipas sekretarit amerikan, kjo ndërhyrje ka për qëllim ruajtjen e funksionimit normal të një prej rrugëve detare më të rëndësishme për transportin global të energjisë.
Megjithatë, ai pranoi se niveli i shqetësimit për sigurinë mbetet i lartë në sektorin e transportit detar, pasi shumë kompani dhe pronarë anijesh po i ndjekin me vëmendje zhvillimet në rajon.
Ngushtica e Hormuzit vlerësohet si një nga nyjet energjetike më të rëndësishme në botë, pasi përmes saj kalon një pjesë e madhe e eksporteve globale të naftës dhe gazit natyror të lëngshëm.
Çdo bllokim i trafikut në këtë korridor detar mund të ketë ndikim të drejtpërdrejtë në tregjet ndërkombëtare të energjisë, si edhe në furnizimin e ekonomive të mëdha importuese.
