Franca ka regjistruar natën më të nxehtë të matur ndonjëherë për periudhën mes 22 dhe 23 qershorit, ndërsa vala ekstreme e të nxehtit ka sjellë të paktën 40 viktima nga mbytjet që prej 18 qershorit, bëri të ditur kryeministri Sebastien Lecornu.
Sipas Meteo-France, kjo ishte nata më e nxehtë e regjistruar në vend që nga nisja e matjeve në vitin 1947.
Të lidhura
None found
Mesatarja e temperaturës në shkallë kombëtare arriti në 21.6°C, duke kaluar rekordin e mëparshëm prej 21.4°C, të shënuar në vitin 2019.
Kryeministri Lecornu e cilësoi situatën si një “tragjedi të madhe”, duke theksuar se viktimat janë pasojë e drejtpërdrejtë e krizës së të nxehtit.
“Shifra e fundit që na është raportuar, është 40 të vdekur që nga 18 qershori – kryesisht të rinj”, deklaroi ai gjatë mbledhjes emergjente.
“Këto janë viktimat e para të krizës me të cilën po përballemi”, shtoi Lecornu.
Që nga java e kaluar, vala e të nxehtit ka përfshirë Francën, duke sjellë probleme në jetën e përditshme, mbyllje shkollash dhe anulime të linjave të trenave.
Të martën, Lecornu thirri ministrat në një tjetër takim urgjent për të diskutuar menaxhimin e situatës.
Në shumë zona të Francës, qytetarët po hidhen në lumenj dhe kanale për t’u lehtësuar nga temperaturat e larta.
Ministrja franceze e Sportit, Marina Ferrari, tha se e kupton përpjekjen e njerëzve për t’u larguar nga i nxehti, por i paralajmëroi ata të mos notojnë në vende të paautorizuara apo të rrezikshme.
Ekspertët e motit shpjegojnë se kjo valë nxehtësie po nxitet nga një fenomen atmosferik i njohur si “Omega block”. Ky formacion, që ngjan me shkronjën greke Omega, krijon në qendër një masë ajri shumë të nxehtë, ndërsa në anët e saj qarkullon ajër më i freskët.
Për pasojë, temperaturat vijojnë të rriten nga dita në ditë. Në Itali, Ministria e Shëndetësisë shpalli nivelin më të lartë të alarmit për 15 qytete, ndërsa autoritetet ndërhynë me masa për të kufizuar punën.
Ndërkohë, Shërbimi Meteorologjik në Mbretërinë e Bashkuar parashikoi që të martën temperaturat në jug të Anglisë të arrijnë deri në 37°C, çka mund të përbëjë një rekord të ri për muajin qershor.
Dhjetëra shkolla njoftuan mbylljen e tyre, pasi godinat e vjetra nuk ofrojnë kushte të përshtatshme për zhvillimin e mësimit me më shumë se 30 nxënës në klasë.
Temperatura të larta po dominojnë edhe rajone të tjera të Evropës, përfshirë Ballkanin.
Kjo është vala e dytë e të nxehtit në vetëm dy muaj, pas një periudhe jashtëzakonisht të nxehtë gjatë majit.
Shkencëtarët theksojnë se rikthimi i shpeshtë i këtyre fenomeneve është një sinjal i qartë i ngrohjes globale dhe paralajmërojnë se ato pritet të bëhen më të shpeshta, më të gjata dhe më intensive. /rel
