Në Mbretërinë e Bashkuar, 13 burra kanë dalë para gjykatës nën dyshimet se janë përfshirë në një skemë të drogimit dhe përdhunimit të një gruaje, e cila, sipas Prokurorisë, është zhvilluar për disa vite dhe është organizuar nga vetë bashkëshorti i saj.
Bashkëshorti i viktimës së dyshuar, një burrë rreth të 60-ave nga Stockport, përballet me 48 akuza penale që lidhen me ngjarje të pretenduara përgjatë një periudhe 22-vjeçare.
Të lidhura
None found
Ai e ka pranuar fajin për 15 akuza, mes tyre pesë për përdhunim, gjashtë për sulm me penetrim, tre për sulm seksual dhe një për shpërndarje të paautorizuar të imazheve intime. Megjithatë, për akuzat e tjera ai është deklaruar i pafajshëm, përfshirë edhe pretendimin se ka komplotuar me persona të tjerë për të droguar dhe përdhunuar bashkëshorten e tij.
Për shkak të kufizimeve ligjore, identiteti i tij nuk është bërë publik, pasi zbulimi i emrit do të sillte identifikimin e viktimës së dyshuar.
Gjykata ka lejuar publikimin e emrave të 13 bashkëpandehurve, të cilët janë nga 28 deri në 73 vjeç. Njëri prej tyre, 59-vjeçari Keith Fotheringham, ka pranuar fajësinë për disa akuza, përfshirë komplot për përdhunim, komplot për sulm me penetrim dhe administrim të një substance për ta paaftësuar viktimën.
Ndërkohë, 12 të pandehurit e tjerë i kanë mohuar akuzat dhe do të gjykohen në Gjykatën e Kurorës në Manchester.
Mes tyre përmendet Jonathan Kirk, një ndihmës mjekësor i lartë, si edhe Karl Lindsay, ish-drejtues ekzekutiv i klubit të futbollit Taunton Town FC. Ky i fundit akuzohet se ka siguruar substanca narkotike në këmbim të fotografive dhe videove të sulmeve të dyshuara. Të dy janë deklaruar të pafajshëm.
Sipas aktakuzës, ngjarjet e dyshuara janë zhvilluar nga viti 2018 deri në vitin 2025, ndërsa hetuesit kanë zbuluar materiale fotografike dhe filmike që dyshohet se dokumentojnë abuzimet.
Një seancë tjetër paraprake është caktuar për më 24 gusht në Gjykatën e Kurorës në Manchester. Gjyqi pritet të nisë në fund të muajit dhe të zgjasë rreth 12 javë.
