Garry Kasparov ishte mes figurave të opozitës ruse që dyshohet se u vunë në shënjestër për t’u vrarë nga Rrjeti RIS, një grup i lidhur me autoritetet ruse. Ish-kampioni botëror i shahut është kritik i Kremlinit dhe mbështet Ukrainën në luftën kundër Rusisë.
Të lidhura
None found
Gazeta spanjolle “El Mundo”, duke iu referuar burimeve, përfshirë persona pranë opozitës ruse, shkruan se objektiva të komplotit ishin edhe ish-deputeti i Dumës Shtetërore Ilya Ponomaryov dhe disidenti Vladimir Kara-Murza. Edhe ata janë kritikë të Kremlinit dhe përkrahin Ukrainën.
Rrjeti u zbulua në shtator, kur FBI-ja dhe agjenci të tjera amerikane njoftuan se kishin identifikuar një grup që, sipas tyre, kishte lidhje me Rusinë. Mes personave që dyshohet se bënin pjesë në të janë ish-koloneli i FSB-së Yuri Khrameyev, 63 vjeç, i njohur si “Kolonel Yuri”; djali i tij Kirill Khrameyev, 27 vjeç dhe oficer i FSB-së; shtetasi kubanez Oemis Romagosa Durruti, 35 vjeç; kubanezi Yaydel Delgado Suarez, 35 vjeç, i njohur si “Viking”; dhe shtetasi venezuelian Angel Eduardo Castro, 22 vjeç.
Autoritetet amerikane deklaruan se pjesëtarë të grupit kishin paguar persona për të spiunuar dhe vrarë dy njerëz në Shtetet e Bashkuara dhe një të tretë në Lituani. Sipas Departamentit amerikan të Drejtësisë, Suarez dhe Castro ndihmuan në rekrutimin e banorëve të SHBA-së për të ndjekur dhe për të tentuar vrasjen e një disidenti të njohur rus që jetonte atje.
Kasparov, shtetas kroat që banon kryesisht në Shtetet e Bashkuara, dyshohet se ishte një nga shënjestrat. “El Mundo” shkruan, duke cituar persona pranë tij, se autoritetet amerikane e njoftuan në verën e vitit 2026 për një komplot vrasjeje ndaj tij, pas të cilit dyshohej se qëndronte Kremlini. Pas paralajmërimit, ai mori mbrojtje të veçantë për herë të parë që nga zhvendosja në Nju Jork më 2013.
Sipas gazetës spanjolle, plani kundër Ponomaryov kishte arritur në një fazë më të avancuar. Ai e ndan kohën mes Kievit dhe Uashingtonit. Në Uashington ka një rezidencë dhe një zyrë, të cilat shërbejnë si degë amerikane të platformës së tij politike, Kongresit të Deputetëve të Popullit. Rusia e shpalli këtë organizatë “terroriste” në dhjetor 2025.
“El Mundo” ngre mundësinë që Ponomaryov të jetë personi i identifikuar si “Viktima 1” në dokumentet e Departamentit amerikan të Drejtësisë. Sipas autoriteteve amerikane, Suarez dhe Castro i propozuan një amerikani 40 mijë dollarë për ta vrarë këtë person, por ai nuk pranoi. Më pas, Suarez dyshohet se kërkoi të rekrutonte të tjerë për vrasjen.
Një burim pranë Ponomaryov i tha BBC-së se ky ishte komploti i nëntë për vrasjen e tij, pa pranuar të jepte hollësi të tjera.
