Gjatë një dëshmie përpara një komisioni të Kongresit amerikan, bashkëthemeluesi i Microsoft, Bill Gates, ka pranuar se ka pasur tri marrëdhënie jashtëmartesore me gra që, sipas dokumenteve të bëra publike, kishin gjithashtu lidhje me financierin famëkeq Jeffrey Epstein.
Në këtë dëshmi, Gates përmendi si partnere Mila Antonovën, lojtare profesioniste e bridge-it, Karima Nigmatulinën, fizikane bërthamore, si dhe mjeken dhe sipërmarrësen Alice Jacobs Nesselrodt. Ai sqaroi se lidhja me Nesselrodt kishte nisur përpara vitit 2010, ndërsa marrëdhëniet me dy gratë e tjera kishin ardhur disa vite më vonë, në një kohë kur ato ishin në të 20-at dhe të 30-at.
Të lidhura
None found
Miliarderi 70-vjeçar deklaroi se për lidhjen me Nesselrodt i kishte folur ish-bashkëshortes së tij, Melinda French Gates, shumë vite më parë. Ndërsa për raportet me Antonovën dhe Nigmatulinën, sipas tij, kishte folur në pranverën e vitit 2013. Kur u pyet nëse mendonte se këto tradhti mund të kenë ndikuar në vendimin e Melindës për divorcin e vitit 2021, ai tha se kjo ishte e mundur.
Gates tha gjithashtu se Epstein kishte marrë vesh për marrëdhëniet e tij me dy prej grave dhe kishte lënë të nënkuptohej se mund ta shantazhonte. Sipas dëshmisë së tij, Epstein kishte shkëmbyer e-maile që sugjeronin se po shqyrtonte një mundësi të tillë, edhe pse Gates këmbënguli se nuk ishte shantazhuar asnjëherë.
Ai pranoi po ashtu se gjatë martesës kishte pasur edhe lidhje të tjera jashtëmartesore, por nënvizoi se ato nuk kishin asnjë lidhje me Epstein. Gates mohoi edhe pretendimet e përfshira në dokumentet e publikuara nga Departamenti amerikan i Drejtësisë, sipas të cilave njëra nga gratë i kishte transmetuar një sëmundje seksualisht të transmetueshme ose se ai i kishte kërkuar Epstein ndihmë për të siguruar antibiotikë.
Në të njëjtën dëshmi, ai tha se është e mundur të ketë qenë në praninë e disa viktimave të Epstein gjatë takimeve që kishte zhvilluar me të, por mohoi prerazi çdo sjellje të papërshtatshme apo përfshirje në veprimtari të paligjshme. Edhe më herët, përfaqësuesit e tij kanë deklaruar se takimet me Epstein kishin qenë një “gabim”, duke mohuar çdo lidhje të Gates me aktivitetet kriminale të financierit.
Bërja publike e kësaj dëshmie ka rikthyer vëmendjen te raportimet e viteve të fundit për jetën private të Gates. Në vitin 2021, në një intervistë për CBS, Melinda French Gates pati deklaruar se marrëdhënia e ish-bashkëshortit të saj me Jeffrey Epstein kishte qenë një nga faktorët që ndikuan në fundin e martesës së tyre 27-vjeçare. Kur u pyet për akuzat se Gates kishte qenë vazhdimisht i pabesë, ajo u përgjigj se ishte ai që duhej të jepte shpjegime për këto çështje.
Raportime të ndryshme mediatike kanë pretenduar gjithashtu se Gates kishte pasur marrëdhënie me punonjëse të Microsoft dhe të Fondacionit Gates. Në vitin 2019, bordi i Microsoft nisi një hetim pasi një inxhiniere raportoi një marrëdhënie me Gates që kishte ndodhur vite më parë. Në vitin 2020, ai u largua nga bordi drejtues i kompanisë, ndërsa zëdhënësi i tij deklaroi se marrëdhënia kishte përfunduar në mënyrë miqësore dhe nuk kishte lidhje me vendimin për largimin.
Sipas raportimeve të The Wall Street Journal, Gates ishte njohur me Mila Antonovën rreth vitit 2010 gjatë një turneu bridge-i. Më pas, Antonova kishte krijuar kontakte edhe me Jeffrey Epstein, i cili financoi studimet e saj në programim kompjuterik dhe më vonë kërkoi që Gates t’ia rimbursonte këto shpenzime. Ky episod është përmendur si një nga arsyet që ngriti dyshime se Epstein mund të përpiqej të ushtronte presion ndaj miliarderit.
Në media janë përmendur edhe pretendime për një lidhje mes Gates dhe neurokirurges Melanie Walker, e cila kishte punuar për Fondacionin Gates dhe njëkohësisht kishte qenë për vite me radhë e afërt me Epstein. Avokati i Walker e ka përshkruar atë si një të mbijetuar të abuzimeve të Epstein, ndërsa përfaqësuesit e Gates kanë pranuar se marrëdhënia mes tyre ishte konsensuale, duke mohuar çdo element të paligjshëm.
Për shumë vite, Bill Gates është konsideruar një nga sipërmarrësit dhe filantropët më të njohur në botë përmes Fondacionit Gates, i cili ka investuar miliarda dollarë në luftën kundër varfërisë dhe sëmundjeve infektive. Megjithatë, publikimi i dëshmisë dhe i dokumenteve të reja ka rikthyer në qendër të debatit publik jetën e tij personale, lidhjet jashtëmartesore dhe kontaktet me Jeffrey Epstein, çështje që vazhdojnë të ndikojnë në reputacionin e tij.
