Një aeroplan i vogël u përplas të premten pasdite me Kullën CITIC, rrokaqiellin me 109 kate që konsiderohet më i larti në Pekin dhe që spikat në panoramën e kryeqytetit kinez. Si pasojë, piloti humbi jetën, ndërsa 13 persona të tjerë mbetën të plagosur.
Goditja shkaktoi rënien e copave të xhamit dhe mbetjeve të avionit nga qindra metra lartësi drejt rrugës, duke përhapur frikë dhe kaos në qendër të qytetit më të ruajtur të Kinës.
Të lidhura
None found
Megjithatë, pak më pas, situata në hapësirën publike online u paraqit sikur ngjarja të mos kishte ekzistuar kurrë. Pamjet dhe çdo përmendje e incidentit u hoqën nga rrjetet sociale kineze, ndërsa autoritetet në fillim nuk e pranuan publikisht se kishte ndodhur diçka. Edhe mediat shtetërore, përfshirë CCTV-në, transmetuesin kombëtar me seli përballë vendit të përplasjes, nuk raportuan për rastin, shkruan CNN.
Sipas raportimit, kjo lidhet me funksionimin e mekanizmit të gjerë të censurës në Kinë dhe me kontrollin e rreptë të shtetit mbi informacionin, sidomos për ngjarje që mund të sjellin vëmendje të padëshiruar ose pasoja negative. Si rezultat, shumë pyetje mbetën pa përgjigje për dëshmitarët dhe për ata që kishin parë raportime të hershme. Për afro një ditë, nuk u bë e ditur as sa persona ishin plagosur.
Vetëm të shtunën pasdite, sipas orës lokale, një media e lidhur me qeverinë e Pekinit njoftoi se një “aeroplan sportiv i lehtë me një motor dhe dy vende u përplas me një ndërtesë të lartë gjatë fluturimit”. Sipas të njëjtit raportim, piloti ishte i vetmi person në bord dhe kishte humbur jetën, ndërsa 13 persona ishin plagosur në vendngjarje. Po ashtu u tha se rasti ishte në “hetim”.
Edhe tani nuk ka qartësi nëse përplasja ndodhi si pasojë e një aksidenti apo ishte e qëllimshme. Një tjetër shqetësim i madh për autoritetet duket të jetë fakti se ngjarja ka ngritur pikëpyetje mbi mënyrën se si piloti arriti të fluturonte mbi kryeqytetin e fortifikuar të Kinës, ku jeton pjesa më e madhe e elitës së Partisë Komuniste dhe ku edhe përdorimi i dronëve është pothuajse i ndaluar.
Aksidenti ndodhi të premten në fund të pasdites, pikërisht në orarin e pikut. Pamjet që qarkulluan online përpara se censura të ndërhynte tregonin një avion të vogël duke u përplasur në katet e sipërme të ndërtesës, e cila njihet edhe me emrin China Zun.
Nga imazhet e publikuara në internet, ku shihej edhe kodi i regjistrimit të mjetit fluturues, dukej se bëhej fjalë për një avion sportiv të lehtë të prodhuar në Kinë, një Sunëard SA 60L Aurora. Sipas të dhënave, ai ishte në pronësi të një kompanie lokale të aviacionit të përgjithshëm që ofron trajnime për pilotë, fluturime rekreative personale dhe fotografi ajrore.
CNN raportoi se pa turma njerëzish që po evakuoheshin nga rrokaqielli dhe që ishin mbledhur në rrugët pranë hyrjes së godinës. Në zonë ndodheshin gjithashtu kamionë zjarrfikës, automjete policie dhe një ambulancë.
Ndërsa videot u përhapën me shpejtësi në rrjetet sociale jashtë Kinës kontinentale, brenda vendit situata ishte ndryshe. Një kërkim në Weibo, platforma kineze që konsiderohet versioni vendas i X, me fjalët “përplasje avioni në Pekin” nuk prodhoi rezultate përkatëse.
Në Kinë është e zakonshme që autoritetet të lëvizin me shpejtësi për të censuruar përmbajtje ose për të vendosur bllokadë informacioni, si edhe të shtojnë ndjeshëm praninë policore sa herë që ndodh një incident që mund të shihet si kërcënim për stabilitetin shoqëror.
Të shtunën, hyrja në rrugët pranë Kullës CITIC ishte kufizuar dhe zona ruhej nga policia. Vetëm personat që mund të provonin se punonin aty lejoheshin të futeshin. Sipas një gazetari të CNN, shoferët e shpërndarjes qëndronin të bllokuar jashtë dhe prisnin që punonjësit të dilnin për të marrë porositë.
Të dhëna të paverifikuara fluturimi nga Flightradar24, të shpërndara online, duket se tregonin një devijim të fortë të trajektores së avionit pasi ai ishte nisur nga aeroporti Shifosi i Pekinit.
Në Pekin, çdo fluturim me avion të lehtë duhet të marrë miratim si nga Administrata e Aviacionit Civil të Kinës, ashtu edhe nga Forcat Ajrore të Ushtrisë Çlirimtare Popullore. Muajin e kaluar, kryeqyteti miratoi një rregullore të gjerë që ndalon praktikisht fluturimet rekreative të rastësishme dhe dronët e konsumatorëve.
Ngjarje vdekjeprurëse dhe shumë të ekspozuara publikisht në Kinë shpesh janë ndjekur nga mungesë informacioni zyrtar, e cila në disa raste mund të zgjasë me vite.
Edhe pas më shumë se katër vitesh, Pekini nuk ka dhënë ende një shpjegim zyrtar për rrëzimin e një avioni pasagjerësh Boeing 737-800 të China Eastern në rajonin Guangxi, aksident ku humbën jetën 132 persona dhe që mbetet katastrofa ajrore më vdekjeprurëse e vendit në dekada.
