Autoritetet në Filadelfia kanë publikuar pamje fotografike dhe video të një burri me maskë kukulle, i cili dyshohet se ka kërcënuar dhe shqetësuar disa persona pranë Bashkisë së qytetit.
Vetëm gjatë javës së kaluar, rreth gjashtë banorë raportohet se janë ngacmuar ose kërcënuar nga i dyshuari. Për këtë arsye, policia u ka kërkuar qytetarëve ndihmë për identifikimin dhe lokalizimin e tij.
Të lidhura
None found
Një prej rasteve më alarmuese u shënua më 12 gusht, rreth orës 05:30 të mëngjesit. Pamjet e një kamere sigurie tregojnë burrin duke ndjekur një grua që po vraponte në rrugë. Sipas policisë, ai e kërcënoi duke i thënë: “A je gati të vdesësh?”
Gruaja, e kapur nga paniku, u pengua dhe pësoi dëmtime. Menjëherë pas ngjarjes, burri u drejtua për nga një stacion metroje, ku autoritetet humbën gjurmët e tij.
Shefi i Policisë së Filadelfias, Jason Smith, deklaroi se i dyshuari mund të ketë regjistruar incidentet me celularin e tij, të cilin e mbante me dritën të ndezur.
Ndaj tij rëndojnë akuza për kërcënime terroriste, sulm dhe vepra të tjera penale.
“A do të garosh me mua?”
Luanda Marinho i tha CBS se e kishte parë të njëjtin burrë gjatë një vrapimi në mëngjes, kur ndodhej së bashku me një shoqe.
Sipas dëshmisë së saj, ai u ishte drejtuar disa herë me pyetjen: “A do të garosh me mua? Vë bast se jam më i shpejtë se ti. A do të garosh me mua?”
Marinho tha se ajo dhe shoqja nuk i ishin përgjigjur, edhe pse burri e kishte përsëritur vazhdimisht të njëjtën pyetje.
“Ishte shumë e çuditshme”, u shpreh ajo, duke treguar se pas incidentit të dyja po shqyrtonin mundësinë për të ndryshuar rrugën e vrapimit. “Ishte thjesht e çuditshme, si një lojë e çoroditur”, shtoi Marinho.
Hetimi vijon, ndërsa policia u bën thirrje të gjithë personave që mund të kenë të dhëna për identitetin ose vendndodhjen e burrit të njoftojnë autoritetet.
