Pas betimit të qeverisë “Rama 3” te Presidenti Ilir Meta, ka reaguar Partia Demokratike përmes një postimi në Facebook, nga zëdhënësja e grupit parlamentar, Oriola Pampuri.
Pampuri shkruan se, qeveria po bën një propagandë bajate me Kodin Etik, ndërkohë që darkon te Nustreti dhe flen në hotele me 700 euro nata.
“Propaganda bajate e qeverisë më të korruptuar në Ballkan, i darkave te Nusreti dhe hoteleve 700 euro nata, shfaq si risi kodin e etikës që qysh prej 2013-ës përdori për t’u hedhur hi syve, qytetarëve. Të gjithë e mbajmë mend me sa ‘etikë’ u ngrit sistemi nepotik në qeveri, me sa ‘etikë’ vëllezër e kushërinj ministrash gëzuan paprekshmërinë për t’u kthyer në zota të drogës dhe trafiqeve, duke dëshmuar se fjalët e shumta mbi etikën fshihnin pikërisht mungesën e saj, pasi si atëhere edhe tani, PPP-ja Rama, Doshi, Rakipi, bashkëqeverisjen, e ka me krimin dhe kundër interesave të shqiptarëve”, shkruan Pampuri./albeu.com
