Ish-kryeministri Sali Berisha ka publikuar një video në Facebook, teksa përshëndet nga ballkoni i shtëpisë simpatizantët e tij, që ishin mbledhur poshtë pallatit për t’i qëndruar në krah dhe për tu solidarizuar me të.
Berisha krah videos shkruan se beteja e qytetarëve kundër dikaturës së drogës do të vazhdojë.
“Duke përshëndetur luftëtarët e lirisë në betejën e tyre pa kthim kundër diktaturës së drogës, krimit e korrupsionit”, shkruan Berisha.
Kujtojmë që më 30 dhjetor 2023 Gjykata e Posaçme pranoi kërkesën e SPAK për ashpërsimin e masës së sigurisë dhe ndalimit të komunikimit për ish-kryeministrin dhe liderin e opozitës, Sali Berisha. Avokati i Berishës e cilësoi ndalimin e komunikimit si privim të lirisë për një deputet dhe paralajmëroi apelimin e masës.
Sipas vendimit të shkurtuar të gjykatës, Berisha urdhërohet të mos largohet nga banesa e tij si dhe të mos komunikojë me persona të tjerë, përveç atyre “që bashkëjetojnë në të njëjtën banesë me të”.
