Kryetari i Partisë Demokratike, Sali Berisha, bëri të ditur se partia ka mbyllur riorganizimin e strukturave të saj drejtuese. Sipas tij, ky përbën procesin më të thellë të ripërtëritjes së PD-së që nga krijimi i saj.
Gjatë një bashkëbisedimi, Berisha vlerësoi se forumet e reja drejtuese kanë një prani më të gjerë të grave dhe të të rinjve. Ai nënvizoi se transformimi nuk lidhet vetëm me shifrat, por edhe me cilësinë e drejtimit, duke deklaruar se PD ka tashmë një ekip të aftë për t’u përballur me sfidat e ardhshme politike.
Të lidhura
None found
Sipas Berishës, javën e kaluar Partia Demokratike përmbylli institucionalizimin e plotë të forumeve të saj. Ai tha se ky proces është udhëhequr nga motoja e ripërtëritjes së PD-së, jo vetëm në aspektin numerik, por edhe për të korrigjuar përmasat që ai i konsideroi deficitare në parti.
Berisha deklaroi se sot 60 për qind e Këshillit Kombëtar të PD-së përbëhet nga gra dhe të rinj. Sipas tij, ky raport është veçanërisht i rëndësishëm, pasi partia kishte trashëguar një deformim nga i cili, siç tha ai, është ndarë përfundimisht.
Ai bëri të ditur se dy të tretat e kryesisë së zgjedhur të PD-së janë zgjedhur për herë të parë, ndërsa për herë të parë janë zgjedhur edhe tre nënkryetarë të partisë. Nga 14 sekretarë, vetëm 3 janë rizgjedhur.
Kryedemokrati u shpreh se përmes këtij procesi janë vendosur raporte të nevojshme përfaqësimi brenda partisë. Ai shtoi se ripërtëritja ka qenë kërkesa kryesore e qytetarëve, anëtarëve dhe mbështetësve të PD-së, duke theksuar se nuk kanë ndryshuar vetëm statistikat, por janë shfaqur edhe cilësi e vlera të spikatura.
Sipas Berishës, në fazën e fundit të rrugëtimit të saj, PD-ja ka një ekip me të gjitha kapacitetet për ta drejtuar partinë drejt përmbushjes me sukses të misionit të saj.
Ai vuri në dukje se PD mbështetet te vota e anëtarësisë dhe shprehu mirënjohje për bashkëpunëtorët e tij që nuk u zgjodhën, por që, sipas tij, kanë dhënë një kontribut të jashtëzakonshëm. Berisha deklaroi se ruan vlerësimin më të lartë për ta.
Shumë prej tyre, tha ai, mbajnë detyra të tjera me rëndësi në Partinë Demokratike, në grupin parlamentar ose në misione që lidhen me reforma themelore në interes të partisë dhe të vendit. Berisha theksoi se procesi i ripërtëritjes do të vijojë dhe nuk do të ndalet.
Ai shtoi se pranë PD-së ndodhen personalitete të njohura dhe individë me vlera të shkëlqyera në fushat e tyre, një pjesë e të cilëve konkurruan me sukses në këtë proces. Sipas tij, ka edhe shumë të tjerë që kanë shprehur gatishmëri për të kontribuar dhe për të vënë potencialin e tyre intelektual e profesional në shërbim të qytetarëve shqiptarë dhe vizionit të partisë, në Shqipëri, Evropë, botë dhe kudo ku ndodhen.
Berisha njoftoi gjithashtu se, për herë të parë në këtë proces ripërtëritjeje, është institucionalizuar roli dhe pozicioni i diasporës. Ai tha se janë hedhur hapa të parë të rëndësishëm, përfshirë zgjedhjen e një nënkryetareje partie dhe të një sekretari për diasporën.
Sipas tij, do të ndërmerren hapa të tjerë për të ridimensionuar rolin e diasporës në jetën politike të PD-së dhe të Shqipërisë. Berisha tha se janë shënuar hapa të rëndësishëm për ata që prisnin me të drejtë ripërtëritjen si tiparin kryesor të procesit dhe se të tjerë hapa do të pasojnë.
