Aplikimet për studimet universitare do të hapen më 27 korrik dhe do të qëndrojnë të mundshme deri më 1 gusht 2026. Maturantët që synojnë të ndjekin arsimin e lartë do të garojnë në tre raunde për programet e studimit.
Regjistrimi do të kryhet nëpërmjet portalit U-Albania, ndërsa përpara aplikimit kandidatët duhet të paguajnë tarifën prej 2 mijë lekësh. Kjo pagesë do të realizohet nga data 3 deri më 26 korrik.
Të lidhura
None found
Sipas Rrjetit Akademik Shqiptar, pas datës 20 korrik në sistem do të ngarkohen notat e tre viteve të gjimnazit dhe rezultatet e Maturës Shtetërore, të cilat maturantët do të kenë mundësi t’i kontrollojnë para se të nisë aplikimi.
Secili kandidat do të ketë të drejtë të përzgjedhë deri në 10 programe studimi, sipas renditjes së preferencave të tij. Aplikimi do të bëhet online nga çdo pajisje e lidhur me internetin, brenda apo jashtë Shqipërisë, ndërsa për maturantët që kanë nevojë për ndihmë, ky proces mund të kryhet edhe në ambientet e shkollave të mesme.
Pasi aplikimi të jetë konfirmuar, të dhënat nuk do të mund të preken më. Për ata që konkurrojnë në degë ku zhvillohet konkurs, autoritetet kërkojnë që të respektohen me kujdes afatet dhe datat e përcaktuara për zhvillimin e tyre.
Regjistrimet do të ndahen në tre raunde. Raundi i dytë është planifikuar nga 15 deri më 17 shtator 2026, ndërsa raundi i tretë nga 8 deri më 21 tetor 2026.
Po ashtu, studentët do të kenë mundësinë të çregjistrohen brenda dy ditëve pas mbylljes së secilit raund, nëse zgjedhin të regjistrohen në një program tjetër studimi.
