Ka pëfunduar seanca në gjykatën e apelit ndaj Alqi Bllakos për masë më të butë sigurie.
Pasi dëgjoi pretendimet e mbrojtjes dhe SPAK, apeli i GJKKO-së u tërhoq për vendim. Vendimi do jepet në orën 13:00.
Ish-deputeti pretendon se nuk ka prova, për fajësinë e tij, sakaq argumenton se nuk është i rrezikshëm dhe s’i shmanget hetimit.
Bllako u arrestua dhe është lënë në qeli pasi dyshohet se ka përfituar rreth 14 milionë lekë për shkelje në procedurën e dhënies së koncesionit për ndërtimin e inceneratorit të Fierit.
Ish-deputeti socialist akuzohet për shpërdorim detyre dhe korrupsion.Nga hetimet ka rezultuar se Bllako në kohën që mbante postin e sekretarit të Përgjithshëm të Ministrisë së Mjedisit, në bashkëpunim me ish-ministrin Lefter Koka dhe ish-kryetarin e Komisionit të Shpronësimit Pëllumb Abeshi, kanë falsifikuar dokumentin në lidhje me sipërfaqen e tokës ku u ndërtua inceneratori duke i shkaktuar dëm buxhetit të shtetit prej 16 milionë lekësh.
Po kështu Bllako dyshohet se ka favorizuar biznesmenin Klodian Zoto për ndërtimin e inceneratorit dhe në këmbim ka përfituar një shumë prej 14 milionë lekësh. Bllako është zyrtari i dytë i lartë që arrestohet për këtë aferë, pas ish-ministrit të Mjedisit, Lefter Koka.
