Në 12 orët e fundit, në mbarë vendin janë evidentuar 23 vatra zjarri, bëri të ditur Ministria e Mbrojtjes. Prej tyre, 8 vazhdojnë të jenë aktive.
Për menaxhimin e situatës janë mobilizuar 310 forca operacionale, mes të cilave 103 efektivë të Forcave të Armatosura, si dhe 26 automjete zjarrfikëse. Në operacione morën pjesë gjithashtu 3 helikopterë dhe 2 avionë “Air Tractor”, por ndërhyrjet nga ajri u pezulluan gjatë mbrëmjes.
Të lidhura
None found
Operacionet në terren po vazhdojnë në Dajt, Priskë të Madhe, Drenie të Patosit, Krujë, malin e Nemërçkës dhe malin e Dhëmbelit. Autoritetet sqarojnë se zonat e banuara nuk janë të rrezikuara.
Në Gurë-Lurë të Dibrës po kryhet një tjetër operacion i rëndësishëm. Për të mbrojtur komunitetin, pranë banesave u angazhuan ekipet zjarrfikëse, vullnetarët dhe dy helikopterë të Forcave të Armatosura.
Ndërkaq, zjarri i regjistruar në Vilëz të Kurbinit është neutralizuar plotësisht, sipas njoftimit të Ministrisë.
Agjencia Kombëtare e Mbrojtjes Civile dhe strukturat vendore po vijojnë bashkërendimin e punës dhe ndërhyrjet në terren, deri në shuarjen e plotë të të gjitha vatrave që mbeten aktive.
