Ministrja e Arsimit dhe Shkencës, Vesna Janevska, ka reaguar pas diskutimeve të shkaktuara nga deklarata e saj se nxënësit e klasës së parë duhet të dëshirojnë të kenë një vëlla ose motër, dhe jo vetëm të kërkojnë njohuri.
Të lidhura
None found
Janevska sqaroi se vendimi për të pasur ose jo fëmijë, si edhe për të pasur ose jo më shumë fëmijë, i përket prindërve dhe duhet të respektohet si zgjedhje personale e çdo çifti.
“Përmes kësaj deklarate desha vetëm të vë në dukje se gjendja është alarmante. Ata që kanë mundësi dhe dëshirë mund t’u krijojnë fëmijëve të tyre mundësinë të kenë një vëlla ose motër. Nuk kam pasur aspak për qëllim të ofendoj dikë apo të ndikoj në vendimet personale”, deklaroi Janevska për “Sitel”.
Ajo nënvizoi se situata demografike mbetet shqetësuese, veçanërisht pasi janë mbyllur 148 objekte shkollore dhe janë reduktuar rreth 400 klasa. Sipas ministres, numri i klasave të prekura mund të ishte dy herë më i lartë, por në procesin e vendimmarrjes janë marrë parasysh edhe tregues të tjerë.
“Popullsia jonë duhet ta kuptojë se çfarë po ndodh në vend. Nëse e do vendin e vet, duhet të angazhohet së bashku me të gjithë ne për përmirësimin e kushteve të jetesës, në mënyrë që emigrimi të mos vijojë dhe rënia demografike të stabilizohet. Ne po bëjmë gjithçka që mundemi, ashtu si edhe ministritë e tjera, përmes autostradave dhe trenave, me qëllim përmirësimin e jetës së qytetarëve, që ata të qëndrojnë këtu dhe të ndërtojnë një jetë të mirë e moderne”, shtoi Ministri i Arsimit.
