Departamenti i Përgjithshëm i Prokurorisë Themelore në Mitrovicë i ka kërkuar Gjykatës Themelore në Mitrovicë që t’ua caktojë masën e paraburgimit tre të pandehurve me inicialet H.K., A.G. dhe E.G. Ata dyshohen për veprën penale “Pranimi i ryshfetit në sektorin privat”.
Të lidhura
None found
Në kërkesën e Prokurorisë thuhet se ekziston dyshimi i bazuar që, më 6 shkurt 2026, brenda objektit të Stacionit të Autobusëve në Mitrovicë, H.K., instruktor në një autoshkollë, dhe A.G., ish-instruktor i së njëjtës autoshkollë, kanë marrë shuma të paspecifikuara parash për t’ua siguruar kandidatëve kalimin e testit teorik për patentë-shofer.
Prokuroria dyshon se në rrobat e kandidates K.K. ishte instaluar një pajisje elektronike me kamerë, ndërsa në vesh i ishte vendosur një kufje. Përmes këtyre pajisjeve, asaj dyshohet se i janë përcjellë përgjigjet e sakta gjatë testimit. Sipas të njëjtave pretendime, kjo metodë është zbatuar edhe ndaj kandidates A.D.
Një rast tjetër dyshohet se ka ndodhur më 31 gusht 2026, kur H.K. dhe E.G., duke vepruar në bashkëpunim, pretendohet se kanë pranuar shuma të panjohura parash për t’ua mundësuar kandidatëve A.R. dhe F.Z. kalimin e testit teorik për patentë-shofer.
Sipas Prokurorisë, kandidates A.R. i ishte siguruar një këmishë e zezë, në të cilën ishte montuar pajisje elektronike, si dhe një kufje për vesh. Kandidatit F.Z., ndërkaq, dyshohet se i ishte dhënë një jelek i zi me pajisje elektronike të instaluar dhe kufje.
Në kërkesë pretendohet se të dyshuarit kishin marrë udhëzime që, me anë të këtyre pajisjeve, të pranonin përgjigjet e sakta gjatë zhvillimit të testit.
Gjykata Themelore në Mitrovicë do ta mbajë seancën ku pritet të shqyrtohet kërkesa për caktimin e masës së paraburgimit.
