Dhomat e Specializuara të Kosovës kanë bërë të ditur se deklaratat përfundimtare në procesin gjyqësor për administrim të drejtësisë ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit do të mbahen më 10, 11 dhe 14 shtator.
Të lidhura
None found
Seancat janë planifikuar të nisin në orën 09:30 dhe do të zhvillohen në prani të publikut.
Në njoftim thuhet se, më 20 gusht, gjyqtari pranoi kërkesat e Bashkim Smakajt, Isni Kilajt, Fadil Fazliut dhe Hajredin Kuçit për t’i ndjekur deklaratat përfundimtare përmes videokonferencës.
Palët do të përdorin këtë fazë të procesit për të përmbledhur qëndrimet dhe argumentet e tyre, duke iu referuar provave të administruara, besueshmërisë së dëshmitarëve, procesverbalit të procedurës dhe ligjit në fuqi.
Fjalën e parë do ta marrë Prokurori i Specializuar, ndërsa më pas deklaratën përfundimtare do ta paraqesë Mbrojtja.
Pas kësaj, palëve do t’u jepet mundësia për t’iu përgjigjur argumenteve të njëra-tjetrës. Të akuzuarit do ta kenë fjalën e fundit.
Me mbylljen e deklaratave përfundimtare, Trupi Gjykues do ta konsiderojë çështjen të përfunduar.
